Tags-Khwab

dekho koī ḳhvāb din Dhale kā
dariyā ke is āḳhirī sire kā

bas ek nuqta kaise āsmān ho gayā
qalīl ḳhvāb kis tarah kasīr ho ga.e

ye sochtā huuñ ki bedāriyoñ meñ ālam-e-ḳhvāb
azaab hai nafas-e-ātish-āshnā kā azaab

nahīñ ab koī ḳhvāb aisā tirī sūrat jo dikhlā.e
bichhaḌ kar tujh se kis manzil par ham tanhā chale aa.e

bahut sī āñkheñ lagīñ haiñ aur ek ḳhvāb tayyār ho rahā hai
haqīqatoñ se muqāble kā nisāb tayyār ho rahā hai

apnī ta.abīr pā rahe haiñ jo
maiñ ne dekhe haiñ ḳhvāb sach-much ke

haqīqat se ḳhayāl achchhā hai bedārī se ḳhvāb achchhā
tasavvur meñ vo kaisā sāmnā hone se pahle thā

maiñ chashm-e-kam-rasā se jise dekhtā na thā
us ḳhvāb-e-lā-hudūd meñ gūñdhā gayā mujhe

jhalak dikhlā ke jis ne niiñd āñkhoñ kī uḌaa.ī thī
usī ne naqd-e-dil ḳhvāb-e-pareshāñ ban ke luuTā hai

ḳhvāb dekhe the suhāne kitne
jaag uThe dard purāne kitne

ga.e zamānoñ kī dard kajlā.ī bhūlī bisrī kitāb paḌh kar
jo ho sake tum se aane vaale dinoñ ke rañgīn ḳhvāb likhnā

mayassar hameñ ḳhvāb-e-rāhat kahāñ
zarā aañkh jhapkī sahar ho ga.ī

Dar nahīñ lagtā kisī ḳhvāb se ham ko lekin
us kī ta.abīr kī farhañg se Dar lagtā hai

ḳhvāb phūloñ ke aañkh ne gūñdhe
phir chaman kyuuñ udaas merā hai

koī tābīr-e-ḳhvāb mil jaatī
kyā muqaddar hī yaas merā hai

tārīk ujāloñ meñ be-ḳhvāb nahīñ rahnā
us ziist ke dariyā ko pāyāb nahīñ rahnā

le gayā duur use ḳhvāb-e-adam kā afsūñ
niiñd se phir na uThā anjuman-ārā apnā

uThā laayā huuñ saare ḳhvāb apne
tirī yādoñ ke bosīda makāñ se

mahrūm-e-ḳhvāb dīda-e-hairāñ na thā kabhī
terā ye rañg ai shab-e-hijrāñ na thā kabhī

ab ḳhvāb nahīñ kam-ḳhvāb nahīñ, kuchh jiine ke asbāb nahīñ
ab ḳhvāhish ke tālāb pe har sū māyūsī kī kaa.ī hai