Tags-Khwab

niiñd rātoñ ko ab nahīñ aatī
ḳhvāb aisā ḳharāb dekhā hai

saañs lenā bhī ho gayā mushkil
jab se āñkhoñ ne ḳhvāb dekhā hai

maiñ is meñ magan vahm hai yā ḳhvāb hai hastī
logoñ ne magar daam bichhāyā hai ki maiñ huuñ

hurūf arz talab kī sūrat guzarte lamhoñ kā ḳhvāb likhnā
hamārī āñkhoñ ke sāmne hī hamāre dil kī kitāb likhnā

jo aks-e-yār tah-e-āb dekh sakte haiñ
ajiib log haiñ kyā ḳhvāb dekh sakte haiñ

jis ne dekhā nargis-e-shahlā kā ḳhvāb
is ne paayā ramz-e-qalbī lā-yanām

ḳhvāb sā kuchh ḳhayāl hai lekin
jaan par ik azaab rahtā hai

darakte rañg bādal ḳhvāb ḳhushbū
samay kī saj se bahra-var rahā huuñ

balā kī tīrgī hai chashm-e-māh ko socheñ
shuā-e-ḳhvāb tarah-dār ko sitārā kareñ

āñkhoñ meñ merī ḳhvāb haiñ taaza saje hue
tābīr-e-ḳhvāb le ke vo aayā hai barsoñ ba.ad

maiñ ḳhvāb kī āzādī
apne andar lā kar

agar ḳhvāb kī
vāqiyat farz kar lī jaa.e

mohabbat ḳhvāb se bāhar talak
rasta banā saktī hai

aap kī yaad se maiñ to kabhī ġhāfil na rahā
aap kahte haiñ tujhe ḳhvāb meñ ġhāfil dekhā

yahī hai zindagī kuchh ḳhvāb chand ummīdeñ
inhīñ khilaunoñ se tum bhī bahal sako to chalo

haqīqatoñ se mafar chāhī thī 'yashab' maiñ ne
par asl asl rahā aur ḳhvāb ḳhvāb rahā

ik ḳhvāb-e-sahar-sāz kā nāyāb ḳhazāna
daryāft kiyā hai tirī bebāk nazar meñ

ye ḳhvāb hai sayyād kā yā ik dil-e-vahshī
ubhrā hai koī tā.ir-e-chālāk nazar meñ

vo ek ḳhvāb jo tāmīr aap hai apnī
maiñ kyā haqīqat-e-rānā.i-e-ḳhayāl kahūñ

jab ḳhvāb huiiñ us kī āñkheñ jab dhund huā us kā chehra
har ashk sitāra us shab thā har zaḳhm añgāra us din thā