Tags-Khwab

na koī ḳhvāb baaqī hai na aañsū ḳhushk āñkhoñ meñ
tahī-dastoñ kī gum-sum nauha-ḳhvānī kā tamāshā kar

ḳhud se miltā huuñ bichhaḌ jaatā huuñ
ḳhvāb zanjīr huā hai kyā hai

tabhī to 'shād' palkoñ par sajā rakkhā hai un ko
maiñ apne ḳhvāb duniyā ko dikhānā chāhtā huuñ

ham apne ḳhvāb jo āñkhoñ meñ lā ke rakhte haiñ
ijāzateñ hameñ is kī ḳhayāl detā hai

ye tirā ḳhvāb hai kitnā nāyāb hai tere ruḳh par usī kī chaḌhī taab hai
ek ḳhurshed hai ek mahtāb hai maan merā kahā tū use bhuul jā

ham un ke ḳhvāb haqīqat banā ke chhoḌeñge
ki chāchā nehru se rishta kabhī na toḌeñge

ga.ī hai shaam abhī zaḳhm zaḳhm kar ke mujhe
ab aur ḳhvāb nahīñ dekhne sahar ke mujhe

sāñche meñ ḳhabar ke Dhal rahī thī
ik ḳhvāb kī lau se jal rahī thī

rūdād safar kī pūchhte ho
maiñ ḳhvāb meñ jaise chal rahī thī

yaad se rihā na ho raat se judā na ho
niiñd se ḳhafā na ho ḳhvāb intizār kar

raat ke pīchhe raat chale
ḳhvāb huā har ḳhvāb-e-sahar

jāgtī āñkhoñ ke sapne dil-nashīñ to the magar
mere har ik ḳhvāb kī ta.abīr haibatnāk thī

maiñ ne us ko ḳhvāb meñ dekhā to vo ik aur hī duniyā meñ thā
us ke har jānib bikhartī jā rahī thī rat-jagoñ kī raushnī

mujhe ma.alūm hai milnā nahīñ mumkin lekin
tū kisī raat mire ḳhvāb meñ aa saktā hai

hañste chamakte ḳhvāb ke chehre bhī miT ga.e
battī jalī to man meñ añdherā sā chhā gayā

us ke ḳhvāb haqīqat haiñ us kī zaat mukammal hai
aur hamārī sab ḳhushiyāñ andāze par rakkhī haiñ

ik ḳhvāb musalsal thā ki khultā hī nahīñ thā
kyā peḌ thā jis kā koī saaya hī nahīñ thā

qabr meñ so.eñge ārām se ab ba.ad-e-fanā
aa.egā ḳhvāb-e-adam dīda-e-bedār ke paas

raat sī niiñd hai mahtāb utārā jaa.e
ai ḳhudā mujh meñ zar-e-ḳhvāb utārā jaa.e

ham apne ḳhvāb kī ta.abīr kuchh nikāleñ kyā
ki ek lamha to ho pā.edār kam-az-kam