Tags-Khwab

mirā dil mere jis pahlū meñ raqsāñ thā usī pahlū meñ jannat thī
ye manzar chashm-e-vā ke ḳhvāb kī ta.abīr thā kal shab jahāñ maiñ thā

kyā yahī ḳhvāb kī ta.abīr huā kartī hai
uḌ ga.ī niiñd bhī āñkhoñ kī kahānī sun kar

churā ke ḳhvāb vo āñkhoñ ko rehn rakhtā hai
aur us ke sar koī ilzām bhī nahīñ aatā

sab hī ta.abīr ke tamannā.ī
mujh ko bas ḳhvāb dekhne kī havas

vafā-shi.ār vafāoñ se baaz aa na sake
unhoñ ne ḳhvāb unheñ aazmā ke dekh liyā

aayā hī nahīñ koī bojh apnā uThāne ko
kab tak maiñ chhupā rakhtā is ḳhvāb-ḳhazāne ko

ye karb ye tasalsul-e-be-ḳhvāb shab to hai
goyā tumhārī yaad kā koī sabab to hai

magar vo shahr kahānī meñ rah gayā hai dost!
jahāñ maiñ rah ke tire ḳhvāb dekh saktā thā

na jaane kis kī nazar lag ga.ī in āñkhoñ par
jo ḳhvāb dekhtī thiiñ ḳhauf ke zamānoñ meñ

yaqīñ hai sub.h-e-qayāmat ko bhī subuhuhī-kash
uTheñge ḳhvāb se saaqī subū subū karte

dekhā nahīñ chāñd ne palaT kar
ham so ga.e ḳhvāb se lipaT kar

jagā.ūñ kis ke manāzir ufuq kī āñkhoñ meñ
ki maiñ hī ḳhvāb huā huuñ nazar banāte hue

aap husn-o-jamāl kī sūrat
ek shā.ir kā ḳhvāb lagtī ho

tire ḳhayāl kī sūrat-garī kā shauq liye
maiñ ḳhvāb ho to gayā huuñ ab aur kyā ho jā.ūñ?

vo ḳhvāb-e-zindagī thā jo ham dekhte rahe
ai 'dil' khulī jab aañkh to duniyā badal ga.ī

hai shor sāhiloñ par sailāb aa rahā hai
ā.ankhoñ ko ġharq karne phir ḳhvāb aa rahā hai

āñkhoñ se kisī ḳhvāb ko bāhar nahīñ dekhā
phir ishq ne aisā koī manzar nahīñ dekhā

ḳhvāb ho jaam ho taara ho ki mahbūb kā dil
TūTne vaalī kisī shai se mohabbat mat kar

kuchh kam nahīñ ajal se ḳhvāb-e-girāñ hamārā
ik lāsh-e-be-kafan hai hindostān hamārā

ai sūr-e-hubb-e-qaumī is ḳhvāb se jagā de
bhūlā huā fasāna kānoñ ko phir sunā de