Tags-Khwab

tū batā aañkh nayā ḳhvāb kahāñ se dekhe
roz shab tujh ko bhulāne meñ guzar jaatī hai

har shikan phuuT phuuT kar roī
raat phir ḳhvāb-e-karbalā dekhā

guzishta raat koī chāñd ghar meñ utrā thā
vo ek ḳhvāb thā yā bas nazar kā dhokā thā

jañgal the aur log purāne sog pahan kar sote the
ek anokhe ḳhvāb se apnī jaan chhuḌā kar laayā huuñ

shab-e-visāl meñ duurī kā ḳhvāb kyuuñ aayā
kamāl-e-fat.h meñ ye Dar kā baab kyuuñ aayā

sukūn-e-qalb kisī ko nahīñ mayassar aaj
shikast-e-ḳhvāb hai har shaḳhs kā muqaddar aaj

kaise manzar the ki shīshoñ kī tarah TuuT ga.e
magar āñkhoñ meñ ka.ī ḳhvāb-e-girāñ aur bhī haiñ

gulistāñ faanī sahī tum ho magar ḳhushbū kā ḳhvāb
maiñ tumhārā giit ban kar jāvedāñ ho jā.ūñgā

tum bhī hote ho mere paas magar
maiñ tumhāre hī ḳhvāb dekhtā huuñ

us kī ta.abīr hai mirā honā
maut ko mahv-e-ḳhvāb dekhtā huuñ

go 'lutf'-e-ḳhufta-baḳht ke aao na ḳhvāb meñ
lekin tire ḳhayāl ko nit dil meñ raah hai

maiñ apnī zaat kī ta.abīr kī talāsh meñ thā
to mere ḳhvāb chale ban ke ham-safar mere

mazā be-hoshī-e-ulfat kā hoshyāroñ se mat pūchho
azīzāñ ḳhvāb kī lazzat ko be-dāroñ se mat pūchho

ġham baḌhne de ai dil aur zarā jāñch aah kī be-tāsīr na kar
hai ḳhvāb adhūrā aap abhī be-samjhe ġhalat ta.abīr na kar

pyaar kiyā thā tum se maiñ ne ab ehsān jatānā kyā
ḳhvāb huiiñ vo pyaar kī bāteñ bātoñ ko dohrānā kyā

ḳhvāb aur nīndoñ kā ḳhatm ho gayā rishta
muddatoñ se āñkhoñ meñ rat-jagoñ kā mausam hai

yaar niklā hai āftāb kī tarah
kaun sī ab rahī hai ḳhvāb kī tarah

sub.h uThte hī maiñ kuchh dhuup bharuñgā in meñ
ḳhvāb dekheñ haiñ to āñkhoñ kī namī ḳharch huī

ġhazal kā silsila thā yaad hogā
vo jo ik ḳhvāb sā thā yaad hogā

kahānī likhte hue dāstāñ sunāte hue
vo so gayā hai mujhe ḳhvāb se jagāte hue