Tags-Khwab

vo lamha mere liye kis qadar azaab kā thā
haqīqatoñ pe gumāñ jab ḳhayāl-o-ḳhvāb kā thā

ai haqīqat ko faqat ḳhvāb samajhne vaale
tū kabhī sāhab-e-asrār nahīñ ho saktā

haqīqatoñ kā pata de ke ḳhud sarāb huā
vo mujh ko hosh meñ lā kar ḳhayāl-o-ḳhvāb huā

ham apne sar par guzishta din kī thakan uThā.e bhaTak rahe haiñ
dayār-e-shab terī ḳhvāb-gāheñ tamām parde girā chukī haiñ

merī hī aañkh ke vasīle se
ḳhvāb andar se dekhtā hai mujhe

sambhāl pā.egā phir kaun ḳhvāb kā varsa
isī ḳhayāl-e-pareshāñ meñ jal bujhe ham log

aisā ho zindagī meñ koī ḳhvāb hī na ho
añdhiyārī raat meñ koī mahtāb hī na ho

ḳhvāhisheñ itnī baḌhīñ insān aadhā rah gayā
ḳhvāb jo dekhā nahīñ vo bhī adhūrā rah gayā

ḳhvāb palkoñ pe mirī aa ke machal jaate haiñ
yā kabhī ban ke guhar aañkh se Dhal jaate haiñ

dasht-e-dil meñ sarāb taaza haiñ
bujh chukī aañkh ḳhvāb taaza haiñ

niiñd palkoñ ke sā.ebāñ meñ nahīñ
tā.ir-e-ḳhvāb kar gayā parvāz

dil hamārā ho gayā vīrān sahrā kī tarah
mar gayā pyāsā yahāñ har ḳhvāb chiḌiyā kī tarah

chashm-e-be-ḳhvāb dāman-e-gulgūñ
sab karishme usī zahīñ ke haiñ

ajiib āb-o-havā kā vo rahne vaalā hai
milegā ḳhvāb o ḳhalā meñ kahīñ vatan us kā

inhī se shab meñ ujālā inhī se nūr-e-ḳhayāl
mire liye to bahut kuchh haiñ dīda-e-be-ḳhvāb

pakaḌ ke dāman-e-dil yā jhukā ke sar apnā
diyā hai ḳhvāb-e-shikasta kā har kisī ko hisāb

ḳhvāb merā hai ain bedārī
maiñ to us meñ bhī dekhtā kuchh huuñ

ho jā.ūñ 'turk' taaq hī is ḳhvāb-gāh kā
lau kī tarah charāġh ke jalne meñ aa rahūñ

hameñ ta.abīr pahle dī ga.ī phir ḳhvāb utre
kitāb-e-zindagī ke is tarah kuchh baab utre

ham ne jo diip jalā.e haiñ tirī galiyoñ meñ
apne kuchh ḳhvāb sajā.e haiñ tirī galiyoñ meñ