Tags-Khwab

der tak Thahrī rahī palkoñ pe yādoñ kī barāt
niiñd aa.ī to ka.ī ḳhvāb suhāne aa.e

chhoḌ sakte haiñ ye sab sehn-o-dar-o-bām-e-jahāñ
qariya-e-ḳhvāb se hijrat nahīñ ham kar sakte

ajiib ḳhvāb thā āñkhoñ meñ niiñd chhoḌ gayā
ki niiñd guzrī hai mujh ko zalīl karte hue

barf ke phuul khile dhuup ke daane nikle
ab ke mausam meñ sabhī ḳhvāb suhāne nikle

ye jāñ-gudāz safar dām-e-ḳhvāb ho na kahīñ
ravāñ hai jis meñ safīna sarāb ho na kahīñ

kaisā jaadū hai samajh aatā nahīñ
niiñd merī ḳhvāb saare aap ke

tū koī ḳhvāb nahīñ jis se kinārā kar leñ
kyuuñ na pahle se ta.alluq pe guzārā kar leñ

hamāre ḳhvāb kī ta.abīr mil na paa.ī to phir
tumhāre ḳhvāb kī ta.abīr ho ga.e ham log

āñkhoñ meñ ḳhvāb chubhan sone nahīñ detī hai
ek muddat se hameñ tū ne jagā rakkhā hai

nahīñ hai qatre kī auqāt bhī jinheñ hāsil
vo kam-nazar bhī samundar ke ḳhvāb dekhte haiñ

unheñ to vaqt kī gardish asiir kar bhī chukī
vo ab guzishta zamāne kā ḳhvāb dekhte haiñ

dil dhaḌakne kā sabab kyā hogā
phir tujhe ḳhvāb meñ dekhā hogā

ḳhvāb meñ bhī tujhe bhūlūñ to ravā rakh mujh se
vo ravayya jo havā kā ḳhas-o-ḳhāshāk se hai

us ne ḳharīdne haiñ ka.ī saat rañg ḳhvāb
ham ne siyāh niiñd kamānī hai aur bas

maiñ ek muddat se is jahāñ kā asiir huuñ aur sochtā huuñ
ye ḳhvāb TūTegā kis qadam par ye rañg chhūTegā kab lahū se

ye kā.enāt bhī ik ḳhvāb-e-nā-tamām sī hai
aur is kā silsila dhokā dikhā.ī detā hai

merī āñkhoñ meñ ḳhvāb baste haiñ
zindagī bhar maiñ ro nahīñ paayā

sab raushniyoñ ko chhīn kar bhī
dīvānoñ se ḳhvāb māñgte ho

ḳhvāb ho chuke 'shāhīñ' saare vāqiye phir bhī
shahr shahr meñ ab tak dāstāñ-sarā.ī hai

chāk-e-tohmat par ghumāyā jā rahā thā ishq ko
jab hamāre ashk ḳhvāb-e-ḳhud-kushī tak aa ga.e