Tags-Khwab

biite ḳhvāb kī aadī āñkheñ kaun unheñ samjhā.e
har aahaT par dil yuuñ dhaḌke jaise tum ho aa.e

yahāñ ke log to ta.abīr jānte hī nahīñ
ye apne niiñd meñ rahne ko ḳhvāb likhte haiñ

phir dikhātā hai mujhe jannat-e-firdaus ke ḳhvāb
kyā farishtoñ meñ tirā jī na lagā mere ba.ad

ta.alluq un āñkhoñ se paidā huā hai
bahut din kā ye ḳhvāb dekhā huā hai

ta.abīr batā.ī jā chukī hai
ab aañkh ko ḳhvāb dekhnā hai

yahī se ḳhvāb janam leñge phir na.e 'nāzim'
lipaT ke niiñd se āñkhoñ ke paañv bhārī rakh

ḳhvāb tak to Thiik thā lekin miyāñ
jāgne ke ba.ad ghabrāyā huuñ maiñ

a peshawar āḳhirī koshish hai ye
ḳhvāb se ik fāḳhta laayā huuñ maiñ

ki ḳhvāb meñ rahe tā-der guftugū tujh se
zarā sī baat ko maiñ vāqi.a banātī huuñ

maiñ ne dekhā ki tū hai pahlū meñ
ab mujassam ye ḳhvāb ho jaa.e

ye tasavvur kā vaar jhūTā hai
ḳhvāb jhūTe haiñ saar jhūTā hai

'kirshn' mohan ḳhvāb kī tābīr bhī
dard kī tafsīr ho kar rah ga.ī

nazar kī had pe jo ik najm-e-ḳhvāb hai 'sājid'
vahī charāġh hai us kā vahī diyā merā

vo avvalīñ dard kī gavāhī sajī huī bazm-e-ḳhvāb jaise
vo chashm-e-surma kalām kartī vo saare chehre kitāb jaise

vo jis kī pādāsh meñ sahar-zād apnī āñkheñ gañvā chuke haiñ
ik aur ta.abīr chāhte huuñ vo avvalīñ shab ke ḳhvāb jaise

aañkh meñ ḳhvāb rachāne kī nahīñ hai qīmat
aañkh meñ ḳhvāb rachā.egā to chhā jā.egā

un ke bhī apne ḳhvāb the apnī zarūrateñ
ham-sā.e kā magar vo galā kāTte rahe

hasīn hote haiñ din ḳhvāb se lapeTe hue
gulāb kartī haiñ rāteñ mahak mohabbat kī

khulegī ek din sab par haqīqat aa.ine kī
tilism-e-ḳhvāb se saarā jahāñ raushan rahegā