Tags-Khwab

phir na.ī hijrat koī darpesh hai
ḳhvāb meñ ghar dekhnā achchhā nahīñ

terī palkoñ pe koī ḳhvāb laraztā hogā
mere gītoñ meñ koī dard javāñ hai ab ke

shab-e-vasl-e-adū terī balā se
kisī muztar ko ḳhvāb aa.e na aa.e

mire ḳhvāb kis ne churā liye sar-e-shām-e-ġham
mirī umr jis ke thī iḳhtiyār meñ kaun thā

mujhe to ḳhvāb hī lagtā hai ab tak
vo kyā thā vo agar aisā nahīñ thā

hamāre ḳhvāb be-parda hue haiñ
hamārī aañkh meñ jhāñkā gayā hai

hameñ kis ḳhvāb se lalchā.egī ye pur-fusūñ duniyā
khurach Daalā hai lauh-e-dil se harf-e-mudda.ā ham ne

tasalsul ḳhvāb-e-ḳhush-āsār kā yuuñ TuuT jaane par
ta.assuf hai magar ai dil pashīmānī nahīñ koī

phir tirī yaad na.e ḳhvāb dikhāne aa.ī
chāñdnī jhiil ke paanī meñ nahāne aa.ī

ḳhaak the ġhuncha-lab aur ḳhvāb thī lahje kī khanak
jhaḌ gayā qabr meñ jab husn-e-sarāpā kā namak

ye ḳhvāb kyā hai ye zisht kyā hai jahāñ kī aslī sirisht kyā hai
baḌā mazā ho tamām chehre agar koī be-naqāb kar de

miltī rahegī ḳhvāb kī sauġhāt ḳhvāb meñ
hotā rahegā tai safar apnā samajh liyā

hamāre ḳhvāb hamārī pasand hote ga.e
ham apne ā.īna-ḳhānoñ meñ band hote ga.e

nīndoñ kā ek ālam-e-asbāb aur hai
shāyad kisī kī aañkh meñ ik ḳhvāb aur hai

khoyā huā huuñ niiñd ke parde ke us taraf
lagtā hai ek ḳhvāb pas-e-ḳhvāb aur hai

lauT aatā hai zaḳhmī ḳhvāb liye
ḳhush-yaqīnī meñ ehtimāl us kā

ye jo uḌtī huī sā.at-e-ḳhvāb hai kitnī mahsūs hai kitnī nāyāb hai
phuul palkoñ se chuntī huī raushnī aur maiñ ḳhushbueñ tahrīr kartā huā

sitāre jazb hue gard-e-rāh meñ kyā kyā
ḳhayāl-o-ḳhvāb ke aa.iiñ badal ga.e kaise

ki jism-o-jāñ meñ ubaal aa.e
na ḳhvāb-zāroñ meñ raushnī thī

rañg-e-tābīr chamaktā hī nahīñ āñkhoñ meñ
raat bhar ḳhvāb kā bāzār sajā rahtā hai