Tags-Khwab

umr bhar jaag ke āñkhoñ kī hifāzat kī hai
jaane kab log mire ḳhvāb churāne aate

biite lamhe lauTe bhī to yaad bane yā ḳhvāb
parchhā.īñ thī parchhā.īñ phir baat kahāñ se aa.ī

dhundlī udaas galiyoñ meñ log saa.e kī tarah chalte haiñ
manzar uThāo palkeñ sajāo sab kuchh to ḳhvāb jaisā hai

is par na jā ki dasht sī vīrāñ haiñ putliyāñ
vo din bhī the ki ḳhvāb ke hiire jaḌe rahe

diloñ meñ palte hue ḳhvāb jānte hī nahīñ
tabāh karne ko be-kāriyāñ bahut sī haiñ

ḳhvāb kā har ik shīsha sau jagah se TuuTā hai
kis qadar paḌī mahñgī ā.īna-garī mujh ko

dūsroñ se nafrat kā ḳhvāb tak na dekhūñgā
dosto ḳhud apne se ishq hī sahī mujh ko

ḳhvāb ke jazīroñ par giit kis tarah likkhūñ
har-qadam pe Dastī hai jab ki zindagī mujh ko

ḳhvāb kā ham-safar rahā huuñ maiñ
muddatoñ dar-ba-dar rahā huuñ maiñ

mirī ārzū-e-dil ko na.ī zindagī milī hai
ki abhī abhī bache haiñ mire ḳhvāb marte marte

zindagī tujh se pyaar kyā karte
ḳhvāb kā e'tibār kyā karte

merī palkoñ kī chilman pe jo ḳhvāb the
vo to sab jal ga.e is bujhī shaam meñ

zindagī meñ bhī ġhazal hī kā qarīna rakkhā
ḳhvāb-dar-ḳhvāb tire ġham ko piroyā kaisā

ab kahāñ dekhne vāloñ ko yaqīñ aa.egā
bāġh-e-jannat thā badan ḳhvāb the bose tere

ab ḳhvāb-o-ḳhayāl ban ga.e ho
ab dil meñ raho, raho nazar meñ

maiñ apnī jāgtī āñkhoñ se zindagī dekhūñ
mirī tamannā hai maiñ ḳhvāb se nikal aa.uuñ

jo merā pyaar hai 'rūmī' agar kabhī mil jaa.e
maiñ apnī zaat ke har ḳhvāb se nikal aa.uuñ

vo ḳhvāb jis pe tīra-shabī kā gumān thā
vo ḳhvāb āftāb kī ta.abīr ho gayā

ho gayā maiñ 'fidā' haqīqat par
ḳhvāb saare satā rahe the mujhe

raat jā chhuptī hai sunsān jazīroñ meñ kahīñ
raat ke ḳhvāb mirī ruuh meñ dar aate haiñ