Tags-Khwab

ḳhayāl o ḳhvāb bhī haiñ sar jhukā.e
ġhulāmī baḳhsh dī āzād kar ke

maiñ jāgte meñ kahīñ ban rahā huuñ az-sar-e-nau
vo apne ḳhvāb meñ tashkīl kar rahā hai mujhe

aah 'habīb' is daur kī bāteñ ḳhvāb kī lazzat yaas kā aalam
kartī thiiñ ishāre jab lailā.eñ uf rī javānī haa.e zamāne

vo dil jo thā kisī ke ġham kā mahram ho gayā rusvā
jahān-e-besh-o-kam meñ ḳhvāb-e-ādam ho gayā rusvā

phaTā-purānā ḳhvāb hai merā phir bhī 'tābish'
is meñ apnā-āp chhupāyā jā saktā hai

khultī hai yahāñ aa ke mire ḳhvāb kī vus.at
hote haiñ mirī aañkh meñ zam donoñ kināre

sab sair ko nikleñge sar-e-sāhil-e-har-ḳhvāb
sayyāhoñ ke chūmeñge qadam donoñ kināre

ḳhvāb āñkhoñ meñ nahīñ dil meñ tamannā bhī nahīñ
ishq māyūs huā ho magar aisā bhī nahīñ

kis se pūchhūñ ye siyah raat kaTegī kis din
so ga.e jā ke kahāñ ḳhvāb dikhāne vaale

dil jin ko DhūñDhtā hai na-jāne kahāñ ga.e
ḳhvāb-o-ḳhayāl se vo zamāne kahāñ ga.e

be-mahrī-e-yahāt tujhe kuchh ḳhabar bhī hai
dekhe ga.e jo ḳhvāb suhāne kahāñ ga.e

fahm zanjīrī-e-be-rabtī-e-dil hai yā-rab
kis zabāñ meñ hai laqab ḳhvāb-e-pareshāñ merā

dekhte rahiye sahar ke ḳhvāb jhūTe hī sahī
mashġhala ye bhī na ho to raat bhar kyā kījiye

misāl-e-barq jo ḳhvāb-e-junūñ meñ chamkī thī
us āgahī ke ta.āqub meñ huuñ chalā jaatā

saarī ta.abīreñ haiñ us kī saare ḳhvāb us ke liye
har savāl us ke liye hai har javāb us ke liye

kholī thī ḳhvāb-e-nāz se kis ne ye uTh ke zulf
laatī hai bū-e-nāz nasīm-e-sahar hanūz

ġhamoñ kī bhiiḌ jab bhī qarya-e-jāñ kī taraf aa.e
bilakte ḳhvāb ḳhāmoshī se rasta chhoḌ dete haiñ

mere bistar tak abhī aa.ī hai vo ḳhushbu-e-ḳhvāb
rafta rafta bāzuoñ meñ bhī badan bhar aa.egī

ye maanā nīñdoñ se aksar fareb khāte rahe
hamāre ḳhvāb magar phir bhī jagmagāte rahe

hairat-kada-e-dahr hai ik ḳhvāb kā aalam
dekhā jo is aalam meñ ajab hai bhī nahīñ bhī