Tags-Khwab

rañg mahloñ ke hasīñ ḳhvāb se bach kar rahnā
hai ḳhabar garm ki ḳhvāboñ kī tijārat hogī

rānā.ī-e-ḳhayāl kī gul-kāriyāñ ga.iiñ
bas ham haiñ aur ḳhvāb-e-pareshāñ hai āj-kal

bikhar ga.e jo kabhī chashm-e-intizār ke rañg
is anjuman se ham ik aur ḳhvāb le aa.e

kabhī sukūñ to kabhī iztirāb jaisā hai
ab us kā milnā-milānā bhī ḳhvāb jaisā hai

ab bhī aksar ḳhvāb meñ un ke dhuñdle chehre aate haiñ
merī guḌiyā kī shādī meñ jo nanhe bārātī the

tum ḳhvāb meñ aaoge ye ma.alūm nahīñ thā
phir ḳhvāb dikhāoge ye ma.alūm nahīñ thā

aisā hai ki sab ḳhvāb musalsal nahīñ hote
jo aaj to hote haiñ magar kal nahīñ hote

bas tajraboñ kī nazr hue apne saare ḳhvāb
kyā ham ne karnā chāhā thā kyā kar diyā gayā

kis ko ḳhabar ki ham ne kyā ḳhvāb bane haiñ umr-bhar
kis se kaheñ ki zindagī kis liye rā.egāñ huī

mil ga.iiñ jis se aap kī nazreñ
aaj tak ḳhvāb dekhtā hogā

ḳhvāb jal jaa.eñ mirī chashm-e-tamannā bujh jaa.e
bas hathelī se uḌe rañg-e-hinā āhista

qariya-e-ḳhvāb ki jis nuur nahāyā huā hai
ham usī se ye shab o roz ujāle hue haiñ

shab-e-vasl dekhī jo ḳhvāb meñ to sahar ko siina figār thā
yahī bas ḳhayāl thā dam-ba-dam ki abhī to paas vo yaar thā

āñkhoñ meñ mirī ḳhvāb basar hone lagā hai
shāyad tirā nīñdoñ se guzar hone lagā hai

jo vāqiye the vo gūñjte zamzamoñ ke mānind maujzan the
jo ḳhvāb the sarv-e-bostāñ the huzūr ko kuchh to yaad hogā

hai chashm nīm-bāz ajab ḳhvāb-e-nāz hai
fitna to so rahā hai dar-e-fitna baaz hai

ye shab kā ḳhvāb yā-rab fasl-e-gul meñ sach na ho jaa.e
qafas ke sāmne jalte hue dekhā hai ghar apnā

ḳhvāb āñkhoñ kī galī chhoḌ ke jaane nikle
ham idhar niiñd kī dīvār girāne nikle

haañ ye bhī tarīqa achchhā hai tum ḳhvāb meñ milte ho mujh se
aate bhī nahīñ ġham-ḳhāne tak va.ada bhī vafā ho jaatā hai

mohabbat ḳhvāb-e-gul hai
shāḳh-e-dil kī suunī palkoñ par