Tags-Khwab

dukān-e-ḳhvāb meñ chehra-e-nigar huuñ
koī shāyad chukā de daam mere

kin bastiyoñ ke yaaro ham ḳhvāb dekhte haiñ
jañgal pahāḌ dariyā tālāb dekhte haiñ

ḳhayāl-o-ḳhvāb ko parvāz detā rahtā huuñ
maiñ apne aap ko āvāz detā rahtā huuñ

jañgal se ghane ḳhvāb-e-haqīqat ram-e-shab
bojhal bikhre ḳhvāb-e-haqīqat ram-e-shab

mirī be-ḳhvāb āñkhoñ ko mubārak
ki āḳhir maut kī niiñd aa rahī hai

merī āñkhoñ meñ jo samā jaa.eñ
sirf vo ḳhvāb dekhtā huuñ maiñ

ashkoñ se tar huī thī yuuñ raat sej un kī
yaad aa gayā thā koī hañgām-e-ḳhvāb shāyad

dil mirā ḳhvāb-gāh-e-dilbar hai
bas yahī ek sone kā ghar hai

darūn-e-ḳhvāb nayā ik jahāñ nikaltā hai
zamīñ kī tah se koī āsmāñ nikaltā hai

kaun hai ye jo mire dil meñ hai ab tak mahv-e-ḳhvāb
DhūñDte haiñ ek muddat se jise shām-o-sahar

āñkhoñ se ḳhvāb dil se tamannā tamām-shud
tum kyā ga.e ki shauq-e-nazāra tamām-shud

maiñ jo haq-e-halāl kī rah pe huuñ
mujhe ḳhvāb meñ bhī qarār hai

hazār ḳhvāb mirī milkiyat meñ shāmil the
maiñ tere ishq meñ sarmāya-dār ban ke rahā

agarche shahr meñ mamnūa thī himāyat-e-ḳhvāb
magar ye dil sabab-e-intishār ban ke rahā

jāntā huuñ niiñd meñ huuñ chal rahā
sochtā huuñ ḳhvāb meñ aayā hai kaun

rañg to maujūd kī tasvīr ho sakte nahīñ
vo jo manzar ḳhvāb haiñ ta.abīr ho sakte nahīñ

niiñd to be-kār meñ in kosnoñ kī zad meñ hai
ḳhvāb hī aise haiñ jo ta.abīr ho sakte nahīñ

sat.h par tiir rahe haiñ din raat
niiñd ik ḳhvāb kī gahrā.ī hai

ḳhvāb meñ jab bhī dekhtā huuñ use
niiñd āñkhoñ se ruuTh jaatī hai

hastī ke bhayānak nazzāre saath apne chale haiñ duniyā se
ye ḳhvāb-e-pareshāñ aur ham ko tā-sub.h-e-qayāmat sonā hai