Tags-Khwab

ilāhī vasl hai yā ḳhvāb hai ye
husūl-e-mudda.ā hai aur maiñ huuñ

rañg ḳhush-bū meñ agar hal ho jaa.e
vasl kā ḳhvāb mukammal ho jaa.e

niiñd jab ḳhvāboñ se pyārī ho to aise ahd meñ
ḳhvāb dekhe kaun aur ḳhvāboñ ko de tābīr kaun

ḳhushnumā dīvār-o-dar ke ḳhvāb hī dekhā kiye
jism sahrā zehn vīrāñ aañkh giilī ho ga.ī

tū bhī 'tasavvur' ḳhvāb vo dekh
aañkh se jo le niiñd nichoḌ

maiñ use ḳhvāb samajh saktī huuñ lekin 'amabar'
lams jaatā nahīñ us kā mirī peshānī se

koī sachche ḳhvāb dikhātā hai par jaane kaun dikhātā hai
mujhe saarī raat jagātā hai par jaane kaun jagātā hai

koī kahtā hai is miTTī meñ ka.ī ḳhvāb haiñ aur in ḳhvāboñ se
koī baiThā naqsh banātā hai par jaane kaun banātā hai

baiThe baiThe āzādī ke ḳhvāb sajāte rahte haiñ phir
pairoñ kī zanjīr ko takte takte thak kar so jaate haiñ

maiñ kise ḳhvāb sunāne ke liye aayā huuñ
shab agar niiñd se bedār nahīñ ho saktī

kitne bhūle hue naġhmāt sunāne aa.e
phir tire ḳhvāb mujhe mujh se churāne aa.e

nīndoñ kā rat-jagoñ se ulajhnā yūñhī nahīñ
ik ḳhvāb-e-rā.egāñ ko bachānā hai aur bas

aañkh kā e'tibār kyā karte
jo bhī dekhā vo ḳhvāb meñ dekhā

ḳhayāl-o-ḳhvāb huā har zamāna-e-vahshat
utar chuke haiñ sabhī ḳhush-ḳhirām gardish meñ

hameñ ab tak tirī kuchh bhī na kahne vaalī āñkhoñ se ye shikva hai
jo kamsin ḳhvāb in āñkhoñ meñ manzar kāḌhte the

azīz-tar hai unheñ ḳhvāb to shikast-e-ḳhvāb
mirī misāl pareshān kyuuñ nahīñ rakhtī

itnā bedāriyoñ se kaam na lo
dosto ḳhvāb bhī zarūrī hai

qafas meñ bhī vahī ḳhvāb-e-pareshāñ dekhtā huuñ maiñ
ki jaise bijliyoñ kī rau falak se āshiyāñ tak hai

bas ek qāmat-e-zebā ke ḳhvāb meñ rahnā
basā ek shaḳhs ko hadd-e-misāl kar rakhnā

har shab ḳhayāl-e-ġhair ke maare alag-thalag
aate haiñ ḳhvāb meñ vo hamāre alag-thalag