Tags-Khwab

maiñ us gul-ḳhvāb kī ma.ayyat meñ saañs lete bhī Dar rahā huuñ
ki shāḳh baḌhne se beshtar hī na qat.a ho ḳhvāhish-e-numū se

maiñ ek muddat se is jahāñ kā asiir huuñ aur sochtā huuñ
ye ḳhvāb TūTegā kis qadam par ye rañg chhūTegā kab lahū se

ye mish.al-e-ḳhvāb bhī na 'sājid' kisī sitāre kī pesh-rau ho
ki mere siine meñ ek ġham ne numūd paa.ī hai aarzū se

tire ḳhvāb aur ḳhayāloñ kī agar mahfil sajī ho to
kabhī gaa.e tire naġhme kabhī bantī sañvartī hai

barham the ḳhvāb niiñd kī retīlī os par
us par sitam ki tā.er-e-shab bolne lage

kal ḳhvāb meñ dekhā sakhī maiñ ne piyā kā gaañv re
kāñTā vahāñ kā phuul thā aur dhuup jaise chhāñv re

ab ke ta.abīr mas.ala na rahe
ye jo duniyā hai is ko ḳhvāb karo

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

koī to thā dhanak dhanak ḳhvāb meñ yā ḳhayāl meñ
rañg ajiib ghul ga.e kaifiyyat-e-malāl meñ

kyuuñ na is baat pe ho jaa.eñ ye āñkheñ pāgal
niiñd bhī utrī huī ḳhvāb bhī aayā huā hai

ḳhvāb-e-ġhaflat meñ jo guzartā hai
ham to us din ko raat kahte haiñ

tumhāre ḳhvāb mirī uñgliyoñ se bāhar haiñ
tumhāre ḳhvāb ko chhūkar bhī dekhnā hai abhī

maiñ bhī rahā huuñ ḳhalvat-e-jānāñ meñ ek shaam
ye ḳhvāb hai yā vāqa.ī maiñ ḳhush-nasīb thā

vo mere ḳhvāb churā kar bhī ḳhush nahīñ 'ajmal'
vo ek ḳhvāb lahū meñ jo phail jaanā thā

vo koī ḳhvāb ho chāhe ḳhayāl yā sach ho
fazā meñ uḌtī huī chāñdnī hai aur maiñ huuñ

nahīñ hai ḳhvāb dīvāne kā hastī
ye duniyā sirf ik dhokā nahīñ hai

kal jo ruḳh-e-araq-fishāñ yaar ne Tuk dikhā diyā
paanī chhiḌak ke ḳhvāb se fitne ko phir jagā diyā

is qayāmat kī jab us shaḳhs ko āñkheñ dī haiñ
ai ḳhudā ḳhvāb bhī denā to sunahrā denā

muhīt-e-ḳhvāb se ik bād-e-tah-nashīñ ubhrī
havā-e-sub.h se ik ġhurfa-e-ḳhayāl khulā

vo kaisī diid kī saa.at thī phir nahīñ aa.ī
vo kaisā ḳhvāb thā ik umr chashm-e-tar meñ rahā