Tags-Khwab

hue haiñ jab se barahna zarūratoñ ke badan
ḳhayāl-o-ḳhvāb kī pinhāñ nazākateñ bhī ga.iiñ

koī baat us meñ zarūr thī jo mire ḳhayāl meñ rah ga.ī
use kyuuñ fareb-e-nazar kahūñ jise maiñ ne dekhā thā ḳhvāb sā

tumhāre ḳhuun se merī ragoñ meñ ḳhvāb raushan hai
tumhārī ādatoñ meñ ḳhud ko Dhalte maiñ ne dekhā hai

na jaane kaun hai jo ḳhvāb meñ āvāz detā hai
ḳhud apne-āp ko nīñdoñ meñ chalte maiñ ne dekhā hai

badal jā.egā sab kuchh bādaloñ se dhuup chaTḳhegī
bujhī āñkhoñ meñ koī ḳhvāb jalte maiñ ne dekhā hai

vo dekhā ḳhvāb qāsir jis se hai apnī zabāñ aur ham
ki goyā ek jā hai us meñ hai vo naujavāñ aur ham

ḳhvāb kī sūrat kabhī ham-rañg afsāna mile
chāñd jaise log ham se māhtābāna mile

aks-dar-aks haqīqat kī lakīreñ raushan
ḳhvāb-dar-ḳhvāb koī husn-e-adā māñge hai

maiñ dekhtā hī rahūñ hashr tak baqā ke ḳhvāb
maiñ hashr tak hī na kyuuñ panja-e-fanā meñ rahūñ

ḳhvāb meñ donoñ ne dekhī raushnī
niiñd meñ mil baañT kar DhūñDā charāġh

tanhā.ī meñ ik ḳhvāb kī lau phuuT rahī hai
bujh saktī nahīñ rañj kī maarī mirī āñkheñ

ḳhvāb meñ jaise ghar se nikal kar ghuum rahā ho koī
raat meñ aksar yuuñ bhī phirī hai tere liye ik zaat

vo bhī kyā din the kyā zamāne the
roz ik ḳhvāb dekh lete the

ḳhvāb galiyoñ meñ phir rahe the aur
log apne gharoñ meñ so.e the

merā saaya bhī nahīñ merā ujāle ke baġhair
aur ujāle kā tasavvur ḳhvāb sā rakhtā huuñ maiñ

aur to kyā thā bechne ke liye
apnī āñkhoñ ke ḳhvāb beche haiñ

maiñ jis meñ kho gayā huuñ mirā ḳhvāb hī to hai
yak do nafas numūd sahī zindagī to hai

ai ḳhvāb ḳhvāb umr-e-gurezāñ kī sā.ato
tum sun sako to baat mirī guftanī to hai

uupar bādal nīche parbat biich meñ ḳhvāb ġhazālāñ kā
dekho maiñ ne harf jamā ke nagar banāyā jānāñ kā

ḳhvāb-gāhoñ se azān-e-fajr Takrātī rahī
din chaḌhe tak ḳhāmushī mimbar pe chillātī rahī