Tags-Khwab

jaanā dekh aanā kuchh rañg abhī bahtā hogā
shahr ke chaurāhe meñ kal ik ḳhvāb huā qurbān

ik raat maiñ so nahīñ sakā thā
aur ḳhvāb bhī dekhnā paḌā thā

giraft-e-tūfāñ meñ aa gayā hai ḳhayāl kā sho.ala-posh dāman
rahe haqīqat hī jin se raushan vo ḳhvāb bhī bujh ke rah ga.e haiñ

aabjū ke hasīñ kināroñ par
ḳhvāb-ālud rahguzāroñ par

ḳhayāl-o-ḳhvāb kī sūrat bikhar gayā maazī
na silsile na vo qisse na ab vo afsāne

zindagī ke dāman meñ rañg-o-nūr-o-nik.hat kyā
ḳhvāb hī to dekhā hai ḳhvāb kī haqīqat kyā

ab to ik ḳhvāb sī lagtī hai haqīqat ye bhī
rabt thā ham ko kisī yār-e-tarah-dār ke saath

tū shāhzādī mahakte hue ujāloñ kī
maiñ ek ḳhvāb añdheroñ kī choT khātā huā

aañkh khulne pe jo uThtā huuñ to chakrātā huuñ
kaun detā hai mujhe ḳhvāb meñ chakkar aise

ta.abīr jāgtī huī āñkhoñ ko kyā mile
ik ḳhvāb bhī to shab ne dikhāyā nahīñ mujhe

ḳhud ko pā-basta-e-zanjīr kiye jā chup-chāp
ḳhvāb sharminda-e-ta.abīr kiye jā chup-chāp

chhīn kar ḳhvāb mire merī talab pūchhte haiñ
raat bhar niiñd na aane kā sabab pūchhte haiñ

kal jī bhar kar zahr uñDelā ham ne ḳhvāb kī fasloñ par
har sū niilī ghaas ugī hai ab zahrīlī miTTī meñ

le gayā sub.h ke nazdīk mujhe ḳhvāb ai vaa.e
aañkh us vaqt khulī qāfila jab duur gayā

yahāñ kuchh apnī havāoñ meñ bhī uḌe haiñ bahut
hamāre ḳhvāb meñ kuchh vo parī bahut aa.ī

ḳhvāb-e-ġhaflat se zarā dekho to kab chauñke haiñ ham
qāfila mulk-e-adam ko jab ravāna ho gayā

rahā ḳhvāb meñ un se shab bhar visāl
mire baḳht jaage maiñ soyā kiyā

niiñd to goyā in āñkhoñ kī dushman hai
mujh ko phir bhī ḳhvāb suhāne aate haiñ

shabnam shabnam ḳhvāb utarte haiñ mujh par
sau sau sūraj dhuup ugāne aate haiñ

ḳhvāb hote haiñ dekhne ke liye
un meñ jā kar magar rahā na karo