Tags-Khwab

gūñjtā hai nāla-e-mahtāb aadhī raat ko
TuuT jaate haiñ suhāne ḳhvāb aadhī raat ko

bhāgte sāyoñ kī chīḳheñ TūTte tāroñ kā shor
maiñ huuñ aur ik mahshar-e-be-ḳhvāb aadhī raat ko

ik shikasta ḳhvāb kī kaḌiyāñ milāne aa.e haiñ
der se bichhḌe hue ahbāb aadhī raat ko

ye jab hai ki ik ḳhvāb se rishta hai hamārā
din Dhalte hī dil Dūbne lagtā hai hamārā

laatā ham tak bhī koī niiñd se bojhal rāteñ
aatā ham ko bhī maza ḳhvāb meñ Dar jaane kā

na niiñd aa.ī na koī sitāra-e-kam-ḳhvāb
bulandiyoñ se utartā huā nazar aayā

maut māñgūñ to rahe ārzū-e-ḳhvāb mujhe
Dūbne jā.ūñ to dariyā mile pāyāb mujhe

mardum-e-dīda-e-qurbānī huuñ maiñ dīvāna
aa.e darvāza khule bin na kabhī ḳhvāb mujhe

chain lene na diyā dard-e-judā.ī ne kabhī
kab maiñ soyā ki jagāyā nahīñ bad-ḳhvāb mujhe

kyā milā hai ma.āl-e-bedārī
merī āñkheñ haiñ aur ḳhvāb tirā

badal liyā hai zarā ḳhvāb ke ilāqe ko
makāñ ko chhoḌ ke ab lā-makāñ meñ rahtā huuñ

ai ishq-e-azal-gīr o abad-tāb mere bhī haiñ kuchh ḳhvāb
mere bhī haiñ kuchh ḳhvāb

ai ishq-e-azal-gīr o abad-tāb
kuchh ḳhvāb ki madfūn haiñ ajdād ke ḳhud-sāḳhta asmār ke nīche

kuchh ḳhvāb haiñ āzād magar baḌhte hue nuur se mar.ūb
ne hausla-e-ḳhūb hai ne himmat-e-nā-ḳhūb

kuchh ḳhvāb haiñ jo gardish-e-ālāt se jūyanda-e-tamkīn
hai jin ke liye bandagī-e-qāzī-e-hājāt se is dahr kī taz.īn

kuchh ḳhvāb haiñ parda-e-anvār magar un kī sahar gum
jis aag se uThtā hai mohabbat kā ḳhamīr us ke sharar gum

ai ishq-e-azal-gīr o abad-tāb
ye ḳhvāb mire ḳhvāb nahīñ haiñ ki mire ḳhvāb haiñ kuchh aur

ye mere gird tamāshā hai aañkh khulne tak
maiñ ḳhvāb meñ to huuñ lekin ḳhayāl bhī hai mujhe

hamārī niiñd meñ koī sarāb-e-ḳhvāb bhī nahīñ
ye kaisā regzār hai fareb-e-āb bhī nahīñ

ḳhvāb meñ dekh rahā huuñ ki haqīqat meñ use
maiñ kabhī dekh nahīñ saktā musībat meñ use