Tags-Khwab

vaqt hai mubtalā-e-ḳhvāb-e-adam
Thokareñ maar kar jagātā huuñ

rañj kyā ḳhvāb ke bikharne kā
kuchh na thā ret kā gharauñdā thā

aap mujh se kisī ta.abīr kī phir baat kareñ
pahle is ḳhvāb-e-tamannā se jagā leñ mujh ko

havā-e-sard kā jhoñkā bhī kitnā zālim thā
ḳhayāl-o-ḳhvāb ke sab pairahan utaar gayā

terā merā hisāb kaisā
ḳhvāb huuñ aur ḳhvāb bhī de

kabhī jo ḳhvāb thā vo pā liyā hai
magar jo kho ga.ī vo chiiz kyā thī

marīz-e-ḳhvāb ko to ab shifā hai
magar duniyā baḌī kaḌvī davā thī

'bedār' ko tujh bin ai dil-ārām
hotā hī nahīñ ki ḳhvāb aave

hazār ḳhvāb liye jī rahī haiñ sab āñkheñ
tire binā haiñ magar merī be-sabab āñkheñ

us roz jo un ko dekhā hai ab ḳhvāb kā aalam lagtā hai
us roz jo un se baat huī vo baat bhī thī afsānā kyā

shab-e-hijr jab ḳhvāb dekhā ye dekhā
ki tujh ko gale se lagā.e hue haiñ

dil yahī soch ke betāb huā jaatā hai
dar-ba-dar merā har ik ḳhvāb huā jaatā hai

terī yādoñ kī mahak aur ye halkī rim-jhim
aaj bistar bhī to kam-ḳhvāb huā jaatā hai

nīñdoñ meñ chhoḌ kar hameñ aage nikal gayā
ham se us ek ḳhvāb kā pīchhā na ho sakā

kabhī kisī ko na ahd-e-vafā kā paas huā
sahar kā ḳhvāb añdheroñ se rū-shanās huā

ik na.e naam se phir apne sitāre uljhe
ye nayā khel na.e ḳhvāb kā baanī niklā

āñkhoñ ke ḳhvāb dil kī javānī bhī le gayā
vo apne saath merī kahānī bhī le gayā

tujh se ai ziist hameñ jitne hasīñ ḳhvāb mile
naqsh-bar-āb kabhī sūrat-e-sīmāb mile

mujh ko 'aḳhtar' na milī nāla-e-shab-gīr kī daad
qarya-e-shauq ke sab log garāñ-ḳhvāb mile

tā phir na intizār meñ niiñd aa.e umr bhar
aane kā ahd kar ga.e aa.e jo ḳhvāb meñ