Tags-Khwab

ḳhayāl-o-ḳhvāb ko 'afroz' koī aa ke samjhā de
bulānā us kī yādoñ kā bulānā āñsuoñ kā hai

be-diloñ kī hastī kyā jiite haiñ na marte haiñ
ḳhvāb hai na bedārī hosh hai na mastī hai

vo niiñd milī hai ki jo puurī nahīñ hotī
vo ḳhvāb milā hai ki jo ma.azūr huā hai

ḳhvāb jo bhī bunā vo bunā rah gayā
umr biitī magar bachpanā rah gayā

baham haiñ be-hisī-o-his ki dil ko ḳhvāb aatā hai
kabhī shaq ho ke dar honā kabhī dīvār ho jaanā

mire qarīb koī ḳhvāb kaise aa paatā
ki mujh meñ rahte haiñ barsoñ se ratjage raushan

us se kahnā ye munādī bhī karā dī jaa.e
koī is ahd meñ ab ḳhvāb na sachchā dekhe

ek muddat se in āñkhoñ meñ koī ḳhvāb nahīñ
us se kahnā vo koī ḳhvāb na aisā dekhe

zindāñ pe tīrgī ke haiñ pahre lage hue
pur-haul ḳhvāb-gāh meñ niind aa.e kis tarah

kabhī jo ḳhvāb thā vo pā liyā hai
magar jo kho ga.ī vo chiiz kyā thī

jo mere liye aaj sadāqat kī tarah hai
vo ḳhvāb na gum ho ke fasāne meñ chalā jaa.e

rafāqat kyā kahāñ ke mushtarak ḳhvāb
ki saarā silsila shub.hāt kā thā

aao jo TuuTe hue ḳhvāb haiñ taqsīm kareñ
jis kī qismat meñ jo girdāb haiñ taqsīm kareñ

maiñ ne kal ḳhvāb meñ ḳhud apnā lahū dekhā hai
Tal ga.iiñ sar se mire saarī balā.eñ shāyad

ḳhafā dekhā hai us ko ḳhvāb meñ dil saḳht muztar hai
khilā de dekhiye kyā kyā gul-e-tābīr-e-ḳhvāb apnā

dām-o-darham hunar-e-ḳhvāb ke badle laao
aise mar.ūb kahāñ maal se maiñ hotā huuñ

safīr-e-fan the so tasvīr kar diye ga.e ham
phir ek ḳhvāb se tābīr kar diye ga.e ham

shab palañg par hāñpte saa.e rahe
ḳhvāb darvāze khaḌā taktā rahā

ye do-roza nashv-o-numā ko tū na samajh ki naqsh-e-pur-āb se
ye sarāb hai ye habāb hai faqat ek qissa-e-ḳhvāb hai

tere ḳhayāl-o-ḳhvāb hī rahte haiñ ās-pās
tanhā.ī meñ bhī maiñ kabhī tanhā nahīñ rahā