Tags-Khwab

un ke Dar se ka.ī rāteñ mirī be-ḳhvāb rahīñ
DhūñDhtī phirtī haiñ ḳhvāboñ meñ jo āfāt mujhe

afsos ḳhvāb-e-marg ne mohlat na dī 'shahāb'
soyā huā nasīb jagāne lagā thā maiñ

hai ġhaib-e-ġhaib jis ko samajhte haiñ ham shuhūd
haiñ ḳhvāb meñ hunūz jo jaage haiñ ḳhvāb meñ

mirī taraf chalī aatī hai niiñd ḳhvāb liye
abhī ye muzhda sunā thā ki raat biit ga.ī

kuchh der rahūñgā kisī taare ke jilau meñ
kuchh der kisī ḳhvāb kī ḳhalvat meñ rahūñgā

ḳhāmosh khaḌā huuñ maiñ dar-e-ḳhvāb se bāhar
kyā jāniye kab tak isī hālat meñ rahūñgā

maiñ is ko dekhne aur bhuul jaane meñ magan huuñ
mire aage jo ye ḳhvāb-e-ravāñ phailā huā hai

shikast-e-ḳhvāb kā aalam na pūchho
baḌī kaḌvī haqīqat sāmne thī

ye zarā duur pe manzil ye ujālā ye sukūñ
ḳhvāb ko dekh abhī ḳhvāb kī tābīr na dekh

rishta-e-dil bhī kisī din ḳhvāb sā ho jā.egā
tere mere darmiyāñ vo fāsla ho jā.egā

ḳhvāb ban kar har ḳhushī rah jā.egī
bin tire kyā zindagī rah jā.egī

gayā vo ḳhvāb-e-haqīqat ko rū-ba-rū kar ke
bahut udaas huuñ maiñ un se guftugū kar ke

merī āñkheñ 'samīna' raushan haiñ
vo mire ḳhvāb meñ jo aayā hai

hai 'zauq' kī azmat ki diye mujh ko sahāre
'chakbast' kī ulfat ne mire ḳhvāb sañvāre

ik kā.enāt-e-ḳhvāb ba-sad mumkināt-e-ḳhvāb
nairañgī-e-ḳhayāl ba-husn-e-ḳhayāl ho

aisā ho zindagī meñ koī ḳhvāb hī na ho
añdhiyārī raat meñ koī mahtāb hī na ho

maiñ ḳhvāb huuñ to ḳhvāb se chauñkāiye mujhe
maiñ niiñd huuñ to niiñd uḌā denī chāhiye

vo mahrūmī kā josh-e-ḳhvāb-parvar ab kahāñ baaqī
bar aa.iiñ itnī ummīdeñ ki armānoñ ke dil TuuTe

hashr meñ ai ḳhudā na le mujh se hisāb-e-ḳhair-o-shar
maiñ ne to sab bhulā diyā raat kā ḳhvāb jaan ke

tarah tarah se tabassumoñ meñ lapeT kar ḳhvāhishoñ ne luuTā
kise chhupā.ūñ kahāñ se bolūñ batāo mujh ko vo ḳhvāb baabā