Tags-Khwab

us ke jalvoñ se pare ik dard kī āvāz sun
ḳhvāb kī ta.abīr se Dar ḳhvāb kā mehvar na dekh

na raat baaqī hai koī na ḳhvāb baaqī hai
magar abhī mire ġham kā hisāb kā baaqī hai

maiñ apne aap se bachhḌā to ḳhvāb sūrat thā
mirī talāsh meñ bhaTkī huī sadā.eñ thiiñ

tuyūr the jo ghoñsloñ meñ paikaroñ ke uḌ ga.e
akele rah ga.e haiñ apne ḳhvāb ke makāñ meñ ham

'farhat-ehsās' ne dekhā hai falak par kahīñ ik ḳhitta-e-ḳhvāb
bech Daalī hai tamām arz-e-badan us ne sunā jaatā hai

na koī ḳhvāb hai āñkhoñ meñ ab na bedārī
tire sabab thā mirā jāgnā bhī sonā bhī

jismoñ kī mehrāb meñ rahnā paḌtā hai
ek musalsal ḳhvāb meñ rahnā paḌtā hai

tumhāre ba.ad na dekhūñ tumhāre jaisoñ ko
to ye shabeñ ye umañgeñ ye ḳhvāb kis se luuñ

dayār-e-ḳhvāb ko niklūñgā sar uThā kar maiñ
ki shaad rahtā huuñ ranj-e-safar uThā kar maiñ

kahīñ kuchh hai purāne ḳhvāb jaisā
mirī āñkhoñ se zālim Dar rahā hai

ḳhvāb kī miTTī ko gūñdhūñgā lahū se maiñ 'figār'
ghar banānā hī nahīñ dhartī se gaarā maañg kar

zindagī be-ḳhvāb lamhoñ meñ simaT kar rah ga.ī
hijr meñ tere palak jhapke hue arsa huā

āñkhoñ se niiñd rūThī to nuqsān ye huā
mere hazāroñ ḳhvāb mire dil meñ so ga.e

keh do muġhannī se ab Thahre ḳhvāb-āvar naġhme roke roke
koī hameñ lalkār rahā hai parbat se mīnāroñ se

ḳhvāb sajātā rahtā huuñ maiñ bujhī bujhī sī āñkhoñ meñ
jis se sab mahrūm haiñ use mayassar likhtā rahtā huuñ

ek laḌkī kā ḳhvāb haiñ ham bhī
koī samjhe nahīñ fuzūl hameñ

dekhte haiñ āsmāñ ke ḳhvāb to sab
hausla lekin pighaltā jā rahā hai

sard nīndoñ kī musalsal gir rahī haiñ pattiyāñ
kuchh safed aur kuchh siyah se ḳhvāb haiñ rātoñ ke biich

ham yūñhī ḳhvāb bunte rahte haiñ
khel saarā qazā kā hotā hai

vo apne ghar meñ ujālā na kar sakā 'jāzib'
tamām raat jo sūraj ke ḳhvāb rakhtā thā