Tags-Khwab

ḳhvāb ho ḳhvāb meñ aate ho chale jaate ho
diid kā jaam luñDhāte ho chale jaate ho

maiñ ḳhvāb meñ bhī vo dāman pakaḌ nahīñ saktā
ye haath aur kisī haath meñ diyā huā hai

ḳhvāb mazdūr hai
raat din sar pe bhārī taġhārī liye

kareñge kaise haqīqat kā sāmnā ham log
hameñ to ḳhvāb hī koī dikhā diyā jaa.e

hameñ jo dekhte the jin ko dekhte the ham
vo ḳhvāb ḳhaak hue aur vo log saa.e hue

is zindagī meñ kuchh to tab-o-tāb chāhiye
āñkhoñ ko roz ek nayā ḳhvāb chāhiye

par lagā kar uḌ ga.e āḳhir mirī nīñdoñ ke saath
pyaar ke vo ḳhvāb jin kā koī mustaqbil na thā

maiñ tujhe ḳhvāb meñ yuuñ ḳhvāb sajātā dekhūñ
jaise tasvīr meñ tasvīr banā lī jaa.e

ḳhvāb uThā kar taaq pe rakkhe maiñ ne bhī
duniyā tere naaz uThā.e maiñ ne bhī

husn aisā ki zamāne meñ nahīñ jis kī misāl
aur jamāl aisā ki DhūñDā kare har ḳhvāb-o-ḳhayāl

na malāl-e-hijr na muntazir haiñ havā-e-shām-e-visāl ke
ham asiir apnī hī zaat ke kisī ḳhvāb ke na ḳhayāl ke

phuul hai jo kitāb meñ asl hai ki ḳhvāb hai
us ne is iztirāb meñ kuchh na paḌhā likhā to phir

ab use ḳhvāb jaan ke so raho lambī taan ke
yaad na aa sakā to kyā yaad bhī aa gayā to phir

ġham kī rātoñ ke ḳhvāb laayā huuñ
hadiya-e-iztirāb laayā huuñ

sab chehroñ par ek hī rañg aur sab āñkhoñ meñ ek hī ḳhvāb
phir bhī jaane bastī bastī maqtal kyuuñ hai shahr-e-gulāb

haa.e vo ḳhvāb ki ta.abīr se sarshār bhī thā
us kī āñkhoñ se jo in.aam liyā āḳhir-e-shab

ye āñkheñ bilkul vaisī haiñ
jaisī mire ḳhvāb meñ aatī thiiñ

kis ko fursat hai ki ta.amīr kare az-sar-e-nau
ḳhāna-e-ḳhvāb ke malbe se nikāle mujhe koī

us tishna-lab ke niind na TuuTe duā karo
jis tishna-lab ko ḳhvāb meñ dariyā dikhā.ī de