Tags-Khwab

ḳhvāb shab kī muñDeroñ pe baiThe hue
ghūrte haiñ mujhe

lagtā hai ki jaltā hai in āñkhoñ meñ koī ḳhvāb
uThtā hai dhuāñ jaise kahīñ aag lagī hai

jo āñkheñ señk rahe haiñ unheñ ḳhabar hī nahīñ
yahāñ pe ḳhvāb jale haiñ to raushnī huī hai

ḳhvāb sunñe se ga.e ishq batāne se ga.e
zindagī ham tirī tauqīr baḌhāne se ga.e

āsmāñ roz mire ḳhvāb meñ aa jaatā hai
ham ḳhayāloñ meñ hasīñ chāñd banāne se ga.e

vo jharoke pardoñ meñ band haiñ vo tamām galiyāñ udaas haiñ
kabhī ḳhvāb meñ sar-e-rahguzar na to aa.e tum na to aa.e ham

rāste ḳhvāb bhī dikhāte haiñ
niiñd meñ jāgte rahā kiije

apnī ta.abīr ke chakkar meñ mirā jāgtā ḳhvāb
roz sūraj kī tarah ghar se nikal paḌtā hai

vo achānak sāmne aayā to mujh ko yuuñ lagā
ḳhvāb thā jaise koī ta.abīr meñ Duubā huā

fāsloñ meñ zindagī kho jā.egī
gumbadoñ meñ ḳhvāb dekhe jā.eñge

abhī aatī hai bū bālish se us kī zulf-e-mushkīñ kī
hamārī diid ko ḳhvāb-e-zuleḳhā ār-e-bistar hai

ḳhvāb meñ bhī yaar ko is kā ḳhayāl aatā nahīñ
jāgnā thā dīda-e-bedār kā fe.al-e-abas

atlas aur kam-ḳhvāb bikharte jaate haiñ
goyā ki ahbāb bikharte jaate haiñ

qatra qatra niiñd pighaltī rahtī hai
reza reza ḳhvāb bikharte jaate haiñ

tire badan meñ mere ḳhvāb muskurāte haiñ
dikhā kabhī mere ḳhvāboñ kā ā.īna mujh ko

kār-e-duniyā koī ri.āyat kar
fursat-e-ḳhvāb chāhtā huuñ zarā

jis ke ā.īne meñ lākhoñ rañg the jalva-fagan
ḳhvāb sā vo lamha-e-aish-e-farāvāñ ho gayā

chubhtī nahīñ haiñ dard kī be-ḳhvāb sūiyāñ
añgāre ab jagāo to shāyad asar leñ ham

us ke junūñ kā ḳhvāb hai kin ta.abīroñ meñ
achchhā vo lagtā hai jakḌā zanjīroñ meñ

duniyā ke ḳhvāb dekhte guzrā tamām roz
uThte hī ḳhvāb-e-asl se daftar meñ aa gayā