Tags-Khwab

mere bhī dil meñ raakh uḌtī hai
tere bhī ḳhvāb is asar meñ haiñ

namī thī palkoñ pe bhīgā huā sā takiya thā
pata chalā ki koī ḳhvāb ham ne dekhā thā

un ke hote koī kamī hai rātoñ kī raunaq meñ
yādeñ ḳhvāb dikhāne vaalī ḳhvāb suhāne vaale

jo ḳhvāb-e-shikasta ko atā hausla kartī
hāsil vo junūñ-ḳhez rifāqat bhī nahīñ thī

adhūre ḳhvāb se pīchhā chhuḌāyā
mujhe ab niiñd pyārī ho ga.ī thī

jo kitāb-e-ishq ke baab the tirī dastaras meñ bikhar ga.e
vo jo ahd-nāma-e-ḳhvāb thā vo mirī nigāh meñ jal-bujhā

ḳhvāb meñ kyā kuchh dikhā lā.egā vo ā.īna-rū
niiñd khulte hī magar hairān kar degā mujhe

hamāre ghar ke āñgan meñ sitāre bujh ga.e lākhoñ
hamārī ḳhvāb gāhoñ meñ na chamkā sub.h kā sūraj

pattharoñ se kab talak bāñdhegī ummīd-e-vafā
zindagī dekhegī kab tak jāgtī āñkhoñ se ḳhvāb

giraft-e-ḳhvāb se jis ne rihā.ī dī tum ko
vo ḳhud bhī jāgtā hogā qayās mat karnā

ik naqsh ki ban ban ke bigaḌtā hī rahā hai
ik ḳhvāb ki puurā kabhī hotā hī nahīñ hai

umr tamāmī shauq se ham ne ek hī titlī paalī thī
jab jab us ko ḳhvāb meñ dekhā uḌtī hai aġhyār ke saath

merī nazroñ meñ bāñkpan kaisā
jāgtā huuñ ki ḳhvāb dekhā hai

āñkhoñ meñ the ḳhvāb sau tarah ke
ye rañg-mahal ujaḌ chukā hai

mirī to aañkh mirā ḳhvāb TūTne se khulī
na jaane paañv dharā niiñd meñ kahāñ maiñ ne

kaho to kis tarah aave vahāñ niiñd
jahāñ ḳhurshīd-rū ho aa ke ham-ḳhvāb

na ḳhvāb hī se jagāyā na intizār kiyā
ham is daf.a bhī chale aa.e chuum kar us ko

yaad meñ ḳhvāb meñ tasavvur meñ
aa ki aane ke haiñ hazār tarīq

ab kahāñ ḳhvāb-e-mohabbat ki vo shab duur nahīñ
jab kahīñ ḳhāk-bharī niiñd se bhar jā.egā tū

zindagī raqsāñ ho 'mahshar' jhuum uTThe kā.enāt
ḳhvāb se uTThā huuñ maiñ añgḌā.iyāñ letā huā