Tags-Khwab

hai dard ke intisāb sā kuchh
vo yaad āñgan meñ ḳhvāb sā kuchh

maiñ us ko ḳhvāb meñ kuchh aise dekhā kartā thā
tamām raat vo sote meñ muskurātī thī

ḳhvāb rātoñ meñ ḳhvāb meñ aa kar
ḳhvāb kī hī tarah bikhartā hai

ḳhvāb-e-sair-e-chaman-e-ālam hai
kyā dil-e-zār hai phūlā baiThā

us se ab ḳhvāb kā rishta bhī ġhalat
sar jhaTak de vo agar yaad aayā

huzūr-e-ḳhvāb der tak khaḌā rahā saver tak
nasheb-e-qalb-o-chashm se guzar tirā huā nahīñ

qissa-e-ḳhvāb huuñ hāsil nahīñ koī merā
aisā maqtūl ki qātil nahīñ koī merā

ḳhema-e-ḳhvāb kī tanābeñ khol
qāfila jā chukā hai āñkheñ khol

agar ḳhudā na kare sach ye ḳhvāb ho jaa.e
tirī sahar ho mirā āftāb ho jaa.e

maiñ use sochtā rahā ya.anī
vo mirā ḳhvāb hai ḳhudā ya.anī

āñkhoñ meñ ik ḳhvāb hai us ko yahīñ sajā.ūñgā
thoḌī zamīñ milī to ik din baaġh lagā.ūñgā

āñkhoñ meñ vo ḳhvāb nahīñ baste pahlā sā vo haal nahīñ hotā
ab fasl-e-bahār nahīñ aatī aur rañj o malāl nahīñ hotā

ḳhayāl-o-ḳhvāb kī rātoñ se jo ubhartā hai
vo ek nuur badan kā nikhār kis kā thā

luTī bahār kā sūkhā gulāb rahne do
hamārī āñkhoñ meñ koī to ḳhvāb rahne do

ye log ḳhvāb bahut karbalā ke dekhte haiñ
magar ġhanīm ko gardan jhukā ke dekhte haiñ

ḳhvāb-e-rañgīñ haiñ us kī āñkhoñ meñ
mere ġham se vo āshnā hī nahīñ

rafta rafta manzar-e-shab taab bhī aa jā.eñge
niiñd to aa jaa.e pahle ḳhvāb bhī aa jā.eñge

ik ḳhvāb misl-e-ashk nikal aa.e chashm se
darvāza-e-gumāñ jo kabhī khaTkhaTā.ūñ maiñ

jhūTā hai jāntā huuñ magar is ke bāvajūd
raunaq lagā.e rakhtā hai ik ḳhvāb kā vajūd

havas-e-ḳhalvat-e-ḳhurshīd-o-nishāñ aur sahī
duur hai sub.h to ye ḳhvāb-e-girāñ aur sahī