Tags-Khwab

faqat ik sarāb hai zindagī ki hasīñ sā ḳhvāb hai zindagī
mire ḳhvāb āñkhoñ se chhin ga.e to ye zindagī bhī muhāl hai

jo ho band aañkh to kyā ḳhabar hameñ saaf aane lage nazar
jise ham samajhte haiñ zindagī faqat ek ḳhvāb-o-ḳhayāl hai

raushan ā.īnoñ meñ jhūTe aks utaar gayā
kaisā ḳhvāb thā merī saarī umr guzār gayā

mirī virāsat meñ jo bhī kuchh hai vo sab isī dahr ke liye hai
ye rañg ik ḳhvāb ke liye hai ye aag ik shahr ke liye hai

qaus par se umuud uThtā huā
ya.anī phir jal uThā hai ḳhvāb us kā

is ḳhaak meñ pinhāñ hai koī ḳhvāb-e-musalsal
hai jis meñ kashish ālam-e-fānī se ziyāda

jo na kaT sakā vo nishān thā kisī zaḳhm kā
jo na mil sakā vo sarāb thā koī ḳhvāb thā

kareñ to kyā hameñ amboh-e-ḳhvāb roktā hai
kabhī jo so.e huoñ ko jagāne lagte haiñ

ḳhvāb-ālud nigāhoñ se ye kahtā guzrā
maiñ haqīqat thā jo ta.abīr meñ rakkhā gayā thā

jāgtī āñkhoñ meñ kaise ḳhvāb kī ta.abīr thī
umr bhar jis ne kisī ko sochtā rahne diyā

shuā-e-mahr kī nazzārgī ke shauq meñ chāñd
falak ke dīda-e-be-ḳhvāb meñ Dhalā hogā

phir vahī ham vahī be-raunaqī-e-dīda-o-dil
husn ke sho.abde ik ḳhvāb-e-gurezāñ nikle

āñkhoñ ke iztirāb se aise jhaḌe haiñ ḳhvāb
shab ke shajar pe niiñd kī sūrat paḌe haiñ ḳhvāb

aatī nahīñ hai niiñd mujhe is liye bhī dost
āñkhoñ kī putliyoñ meñ hazāroñ jhaḌe haiñ ḳhvāb

niklā na phir bhī koī natīja bahār kā
ta.abīr se agarche bahut hī laḌe haiñ ḳhvāb

jab bhī chalā huuñ niiñd ke raste pe yuuñ lagā
hāthoñ ko joḌ kar mire aage khaḌe haiñ ḳhvāb

dil se ġhamoñ kā is liye chhālā na jā sakā
kāñToñ kī misl chashm-e-talab meñ aḌe haiñ ḳhvāb

tujh ko kahāñ ḳhabar hai ki kaise haiñ ratjage
tujh ko kahāñ ḳhabar hai ki kitne kaḌe haiñ ḳhvāb

is baar bhī yahāñ ḳhas-o-ḳhāshāk kī tarah
āñkhoñ meñ jis qadar the vo saare saḌe haiñ ḳhvāb

aayā nahīñ 'nabīl' palaT ke vo ek shaḳhs
ranjīda is liye bhī hamāre baḌe haiñ ḳhvāb