Tags-Khwab

us siyah-baḳht kī rāteñ bhī koī rāteñ haiñ
ḳhvāb-e-rāhat bhī jise ḳhvāb-e-pareshāñ ho jaa.e

raat yuu.n tere KHvaab se guzraa
ki badan chuur chuur meraa thaa

haiñ tasavvur meñ us ke āñkheñ band
log jāneñ haiñ ḳhvāb kartā huuñ

badalte vaqt ne taqsīm kar diyā mujh ko
the mere ḳhvāb jo tere vahī kisī ke hue

qayāmat-ḳhvāb se āñkheñ khulī thiiñ
phir āñkheñ khol kar ham so rahe haiñ

aañkh kis tarah khule merī ki maiñ jāntā huuñ
aañkh khulte hī sabhī ḳhvāb ujaḌ jaate haiñ

mire sivā kuchh nahīñ kahīñ bhī azal abad ek ḳhvāb-e-mastī
zamīñ qadam-bhar hai mere nīche falak nigah-bhar hai aur maiñ huuñ

kuchh ḳhvāb kuchh ḳhayāl meñ mastūr ho ga.e
tum kyā qarīb nikle ki sab duur ho ga.e

din ke paas kahāñ jo ham rātoñ meñ maal banāte haiñ
bad-hāloñ ko ḳhvāb hī shab bhar ko ḳhush-hāl banāte haiñ

vo ek ḳhvāb jo phir lauT kar nahīñ aayā
vo ik ḳhayāl jise maiñ bhulā nahīñ saktā

maiñ ek ḳhvāb sahī aap kī amānat huuñ
mujhe sambhāl ke rakhiyegā jism-o-jāñ kī tarah

bahut royā huuñ maiñ jab se ye maiñ ne ḳhvāb dekhā hai
ki aap aañsū bahāte sāmne dushman ke baiThe haiñ

dar-ba-dar be-pairahan thā ḳhvāb-e-ishq
maiñ ne us ko aañkh pahnā.ī to thī

numūd apnī vaaq.e meñ kuchh bhī nahīñ hai
yahāñ ḳhvāb hai zindagānī kī sūrat

hisār-e-ā.īna-o-ḳhvāb se nikalne tak
shikast-e-zāt kā manzar sambhāl ke rakhnā

girā diyā jise ik baar apnī nazroñ se
phir us ko ḳhvāb kī had se bhī kuchh pare rakhnā

raat kyā kyā mujhe malāl na thā
ḳhvāb kā to kahīñ ḳhayāl na thā

har kisī ḳhvāb ke chehre pe likhūñ naam tirā
maiñ use apnā hunar samjhūñ ki in.aam tirā

takalluf-bartaraf farhād aur itnī subukdastī
ḳhayāl āsāñ thā lekin ḳhvāb-e-ḳhusrav ne girānī kī

khul gayā na ho kisī aur taraf baab mirā
kahīñ āvāra-e-ġhurbat hī na ho ḳhvāb mirā