Tags-Khwab

dil-e-āvāra kahīñ chashm kahīñ ḳhvāb kahīñ
kaisā bikhrā dar-e-āfāq pe asbāb mirā

ḳhudā kare ki ho ta.abīr ḳhvāb kī achchhī
milā huuñ raat maiñ phūloñ ke darmiyāñ tujh se

kab payām-e-visāl aatā hai
ḳhvāb hai jo ḳhayāl aatā hai

mujh se ye pyaas kā sahrā nahīñ dekhā jaatā
roz ab ḳhvāb meñ dariyā nahīñ dekhā jaatā

ḳhvāb-hā-ḳhvāb jis ko chāhā thā
rañg-hā-rañg usī ko bhuul gayā

kyā ajab ḳhvāb ke ḳhushbū ke Thikāne the udhar
ab to kuchh yaad nahīñ kaun zamāne the udhar

kabhī ḳhushbū kabhī naġhma kabhī rañgīn pairāhan
'nadīm' ugtī hai yuuñ hī fasl-e-ḳhvāb āhista āhista

sirf afsos kā saaya hī nahīñ hai ham par
ham ki haiñ ḳhvāb-e-tab-o-tāb ke zindānī bhī

be-niyāzī kī vo ḳhū jaise kabhī thī hī nahīñ
ḳhvāb the jaise vo ayyām-e-tan-āsānī bhī

koī apne vāste mahshar uThā kar le gayā
yaanī mere ḳhvāb kā manzar uThā kar le gayā

atlas-o-kam-ḳhvāb meñ malbūs thā jis kā badan
kyuuñ mirī mailī sī vo chādar uThā kar le gayā

vo ḳhvāb jis pe tīra-shabī kā gumān thā
vo ḳhvāb āftāb kī ta.abīr ho gayā

bulāo ḳhvāb-nagar meñ phir us sitāre ko
vahī karo jo sabhī ḳhush-ḳhayāl karte haiñ

jo apnī niiñd kī pūñjī bhī kab kī kho chukī haiñ
unhīñ āñkhoñ meñ ham ik ḳhvāb rakhnā chāhte haiñ

ek surūd-e-raushanī nīma-e-shab kā ḳhvāb thā
ek ḳhamosh tīrgī sāneha-āshnā bhī thī

bahut din ba.ad kuchh an-dekhe ḳhvāb utre haiñ āñkhoñ meñ
siyah ḳhāne meñ kyā kyā sham.a raushan kar rahā huuñ maiñ

hamārī raah alag hai, hamāre ḳhvāb judā
ham un ke saath na hoñge, jo qāfile hue bhī

hameñ na yaad dilāo hamāre ḳhvāb-e-suḳhan
ki ek umr hue hoñT tak hile hue bhī

bāñjh āñkheñ huiiñ magar 'zākir'
ḳhvāb aate rahe ravānī se

ḳhvāb bikhreñge to ham ko bhī bikharnā hogā
shab kī ik ek aziyyat se guzarnā hogā