Tags-Khwab

ranj-o-ġham se irtibāt-e-jism-o-jāñ samjhā thā maiñ
hasti-e-nākām ko ḳhvāb-e-girāñ samajhtā thā maiñ

mausam ke sau ruup magar in āñkhoñ meñ
ḳhvāb vahī haiñ ḳhvāboñ kī ta.abīreñ bhī

jise kal ḳhvāb meñ dekhā thā maiñ ne
vo mere sāmne yuuñ aa gayā hai

ubhrā thā āñkhoñ meñ ek sunahrā ḳhvāb
jaate jaate de gayā zaḳhm nishānī meñ

bichhaḌte jaate haiñ ahbāb ḳhvāb kī sūrat
guzartā jaatā hai yādoñ kā kārvāñ aage

bhaTak jā.eñgī rāteñ jis ke hāthoñ
abhī us ḳhvāb kā charchā nahīñ hai

mire najm-e-ḳhvāb ke rū-ba-rū koī shai nahīñ mire Dhañg kī
ye falak hai kisht-e-ġhubār sā ye zamīñ hai paanī ke rañg kī

kisī shaam mere jilau meñ thā koī ḳhvāb vus.at-e-shahr kā
kisī sub.h mere vajūd par ye zamīn logoñ ne tañg kī

mirī be-kalī kā subūt hai mirī sham.a-e-ḳhvāb ke sāmne
koī garm mauj gumān kī koī sard lahr umañg kī

mire ḳhāk-dāñ kī sipar to hai kisī mauj-e-tez se aa.ina
mire ḳhvāb-e-satez kī teġh par vahī tā damaktī hai zañg kī

yārab vo ḳhvāb-e-haq meñ mire ḳhvāb marg ho
aave vo mast-e-ḳhvāb agar mere ḳhvāb meñ

ḳhvāb hai terī chāhat mujhe
ḳhvāb ḳhud ko dikhātī huuñ maiñ

koī ḳhvāb hai na ḳhayāl hai koī aarzū hai na justujū
ye kahāñ hai lā ke biThā diyā mujhe qaid-e-jāñ se nikāl ke

maiñ bhaTak rahā thā jihat jihat tire naqsh-e-pā kī talāsh meñ
mire saath saath chalā kiye ka.ī aks ḳhvāb-o-ḳhayāl ke

jo ḳhvāb kī dahlīz talak bhī nahīñ aayā
aaj us se mulāqāt kī sūrat nikal aa.ī

ye merā zarf ki maiñ ne asāsa-e-shab se
bas ek ḳhvāb liyā aur chand sham.a-dān liye

maiñ apne kisī ḳhvāb kī muñh-zor havā meñ
aksar hī nikal jaatā huuñ aflāk se aage

ek naqsha thā ḳhvāb kā khīñchā
is liye taar taar āñkheñ haiñ

ḳhvāb dekhā 'rabāb' ne kyūñkar
is liye sū-e-dār āñḳheñ haiñ

ajiib thī vo ajab tarah chāhtā thā maiñ
vo baat kartī thī aur ḳhvāb dekhtā thā maiñ