Tags-Khwab

raat ik ḳhvāb jo dekhā to huā ye mālūm
din bhī us ḳhvāb kī tasvīr banāne meñ gayā

ye ghaḌī koī farāmosh nahīñ kar saktā
merī āñkhoñ meñ hai ik ḳhvāb suhānā is vaqt

ḳhvāb meñ us se roz milā kartā thā 'mīt'
lekin sach meñ nahīñ milā so zinda huuñ

ai rāh-e-ishq ke raahī sun chal aise safar kī lazzat meñ
tirī āñkhoñ meñ na.e ḳhvāb to hoñ par ḳhvāboñ kī ta.abīr na ho

nashsha-e-ḳhvāb churā laa.e tirī āñkhoñ se
nāla-e-shab meñ asar ho ye zarūrī to nahīñ

aaj kis ḳhvāb kī ta.abīr nazar aa.ī hai
ik chhanaktī huī zanjīr nazar aa.ī hai

abas pareshāñ haiñ ta.abīr kī tag-o-dau meñ
milī hai niiñd hameñ ḳhvāb dekhne ke liye

chaak par miTTī ko mar jaanā hai
ḳhvāb-e-ta.amīr bikhar jaanā hai

kitne ḳhvāb sameTe koī kitne dard kamā.egā
paimāne kī had hotī hai āḳhir bhar hī jā.egā

afsāna-e-guzishta ye kahtā hai mujh se dil
kyā zikr un kā bhūliye bāteñ haiñ ḳhvāb kī

bolī lagī mata-e-hunar kī to ahl-e-fan
jaldī meñ apne ḳhvāb bhī nīlām kar ga.e

ḳhvāb-e-derīna se ruḳhsat kā sabab pūchhte haiñ
chaliye pahle nahīñ pūchhā thā to ab pūchhte haiñ

kahūñ kyā ki dasht-e-hayāt meñ rahā silsila vo sarāb kā
kabhī hausla hī na kar sakī mirī aañkh dariyā ke ḳhvāb kā

vo tujh se karte haiñ merī shikāyateñ lekin
mujhī se vo tire ḳhvāb-o-ḳhayāl māñgte haiñ

zindagī bachchī hai is kā dil na toḌ
ḳhvāb kī nannhī se guḌiyā bhej de

umr-e-be-andāz ko kaafī sahārā ho gayā
ḳhvāb-e-ḳhush-andāz us ke saath chalte dekhnā

reg-e-be-tadbīr meñ parvāz mahv-e-ḳhvāb hai
ik havā-e-tez meñ us ko machalte dekhnā

log karte haiñ ḳhvāb kī bāteñ
ham ne dekhā hai ḳhvāb āñkhoñ se

be-niyāzāna rahegā tirī duniyā meñ faqīr
ḳhvāb-o-ḳhvāhish nahīñ darkār koī mastī ho

jo fasl ḳhvāb kī tayyār hai to ye jaano
ki vaqt aa gayā phir dard koī bone kā