Tags-Kiss

kabhī na jin ko lagāyā thā muñh gale meñ bāheñ vo Dālte haiñ
jo māñgtā huuñ maiñ ek bosa to aap āñkheñ nikālte haiñ

kam bhī dene meñ bahut fā.eda hai
bosa ik dījiye das pā.iyegā

bosa diye se husn meñ hogī kamī na yaar
hotā nahīñ zakāt se nuqsān maal kā

bosa liyā jo chashm kā bīmār ho ga.e
zulfeñ chūīñ balā meñ giraftār ho ga.e

jī jalā kar ek bosa māñgte haiñ baar se
aage yā qismat vo dekheñ haañ kare hai yā nahīñ

ūftāda bhī hai ye aur baḌā shoḳh bhī hai
gul-e-ruḳhsār kā le letā hai bosa sehrā

dikhā ke jumbish-e-lab hī tamām kar ham ko
na de jo bosa to muñh se kahīñ javāb to de

jo mirī maañ ne diyā raḳht-e-safar kī sūrat
mere māthe pe abhī tak hai vo bosa raushan

le liyā pyaar se aks apne kā jhuk kar bosa
us ne dekhā jo vo pāñ-ḳhurda dahan aa.ine meñ

sūkhe laboñ pe us ne Tapkāyā āb-e-bosa
aur vo bhī apne hoñThoñ se chhān kar diyā hai

jo bosa vasl meñ māñgoñ to deñ sazā mujh ko
jo lab hilā.ūñ to vo kaaT leñ zabāñ merī

bosa māñgā jo shab-e-vasl to bolā hañs kar
kahīñ aisā na ho har roz kī tū kar bāñdhe

bole vo bosa-hā-e-paiham par
are kam-baḳht kuchh hisāb bhī hai

chamakte chāñd se chehroñ ke manzar se nikal aa.e
ḳhudā hāfiz kahā bosa liyā ghar se nikal aa.e

hamārā le ke dil kyā ek bosa bhī nahīñ deñge
vo yuuñ dil meñ to raazī haiñ magar zāhir jhagaḌte haiñ

bujhtī āñkhoñ meñ tire ḳhvāb kā bosa rakkhā
raat phir ham ne añdheroñ meñ ujālā rakkhā

lab par se bulāq apnī dam-e-bosa uThā do
andesha-e-zambūr-e-asal jaa.e to achchhā

na do dushnām ham ko itnī bad-ḳhūī se kyā hāsil
tumheñ denā hī hogā bosa ḳham-rūī se kyā hāsil

bosa to us lab-e-shīrīñ se kahāñ miltā hai
gāliyāñ bhī milīñ ham ko to milīñ thoḌī sī

dete ho bosa to kahīñ laao bhī
ḳhair kisī tarah se sharmāo bhī