Tags-Lab

muskurā kar zer-e-lab shāyad yahī kahte haiñ vo
laakh saudā.ī sahī 'bāqar' magar apnā to hai

maut hai jur.at-e-iz.hār kī pazmurdā-labī
sāz-e-taḳhlīq lab-e-arz-e-hunar merā hai

tujh lab kī sifat la.al-e-badaḳhshāñ suuñ kahūñgā
jaadū haiñ tire nain ġhazālāñ suuñ kahūñgā

ye tamkīñ hai aur lab hoñ jān-e-tabassum
na khul jaa.e ai shoḳh terī banāvaT

jā baiThte haiñ ham lab-e-dariyā pe jab kabhū
kyā jhumke apne ham ko dikhātī hai chāndnī

bārisheñ us kā lab-o-lahja pahan letī thiiñ
shor kartī thī vo barsāt meñ jhāñjhar kī tarah

jaane kis rañg meñ tafsīr kareñ ahl-e-havas
mad.h-e-zulf-o-lab-o-ruḳhsār karūñ yā na karūñ

piitā rahā kyā umr bhar pī kar tamannā kā lahū
kuchh din se merī āstīñ kuchh zer-e-lab kahtī to hai

aaj lab-e-guhar-fishāñ aap ne vā nahīñ kiyā
tazkira-e-ḳhajista-e-āb-o-havā nahīñ kiyā

phir tasavvur meñ tere lab aa.e
merī har baat phir hinā.ī hai

pā rahā hai dil musībat ke maze
aa.e lab par shikva-e-bedād kyā

muqābil us dur-e-dandāñ ke ye guhar kyā hai
aur 'aish' laal kī us lab ke aage dar kyā hai

baat karne meñ jo lab us ke hue zer-o-zabar
ek saa.at meñ tah-o-bālā zamāna ho gayā

bhīgtī jaatī hai raat aur abhī sohbat hai garm
jaam lab-rez isī aalam meñ hamārā hotā

sāz-e-lab guñg the be-nūr thī qindīl-e-nazar
aise māhaul meñ ilzām-e-hunar kyā letā

ab jāñ-ba-lab haiñ shahr ke bīmār be-shumār
zar kī havas meñ sab ne masīhā.ī bech dī

ek chuppī tum ne chāhī
maiñ ne apne lab siye the

koī mast hai koī tishna-lab to kisī ke haath meñ jaam hai
magar is pe koī kare bhī kyā ye to mai-kade kā nizām hai

tahī dāman huuñ magar ahl-e-havas ke aage
roktā hai lab-e-iz.hār se pindār mujhe