Tags-Lab

koī sard havā lab-e-bām chalī
phir ḳhvāhish-e-be-anjām chalī

gale meñ Daal kar bāñheñ vo lab se lab milā denā
phir apne haath se sāġhar pilānā yaad aatā hai

nahīñ āb-e-baqā juz jalva-e-dost
kisī lab-tishna-e-dīdār se pūchh

lab-e-zaḳhm-e-jigar to hañste haiñ
tū ne ai baḳhiya-gar siyā kyā hai

tire sitam kā bahut ġhalġhala sunā.ī de
mire habīb mujhe izn-e-lab-kushā.ī de

aatā hai jī meñ sāqi-e-mah-vash pe baar baar
lab chuum luuñ tirā lab-e-paimāna chhoḌ kar

le ke paikāñ se tire tiir batā to qātil
ḳhuun meñ Duube nahīñ kab tā lab-e-sofār rahe

aaj ke daur kā insān ajab hai yārab
lab pe tārīf hai siine meñ hasad hai had hai

har aarzū kā naam nahīñ ābrū-e-jāñ
har tishna-lab jamāl-e-ruḳh-e-karbalā na thā

bhaḌkā rahe haiñ aag lab-e-naġhmagar se ham
ḳhāmosh kyā raheñge zamāne ke Dar se ham

sī diye us ne mire hoñT to kyā
ab mujassam lab-e-iz.hār huuñ maiñ

arsh tak jaatī thī ab lab tak bhī aa saktī nahīñ
rahm aa jaatā hai kyuuñ ab mujh ko apnī aah par

tuur vaalo se lab-e-bām haiñ aane vaale
dekheñ laḌtī haiñ nigāhoñ se nigāheñ kyūñkar

lab-kushā.ī meñ zamāne se nahīñ Darnā thā
umr bhar ham ne kiyā kyā hameñ kyā karnā thā

fariyād hai ab lab par jab ashk-fishānī thī
ye aur kahānī hai vo aur kahānī thī

yaqīnan aa gayā hai mai-kade meñ tishna-lab koī
ki piitā jā rahā huuñ kaifiyat kam hotī jaatī hai

shaam ke Dhalne se pahle maiñ kabhī piitā nahīñ
ye bhī sach hai dopahar se tishna-lab rahtā huuñ maiñ

maiñ aksar sochtā rahtā huuñ tere sāmne jā kar
tamannā kyuuñ lab-e-iz.hār se aage nahīñ jaatī

hikāyāt-e-lab-o-ruḳhsār se aage nahīñ jaatī
tamannā kyā jo tere pyaar se aage nahīñ jaatī

ka.ī din hue haiñ 'nazīr' ab ki ḳhafā hai ham se vo ġhuncha-lab
use kyā vale hameñ roz-o-shab na to sabr hai na qarār hai