Tags-Lab

lab-e-lālīñ pe ye lahreñ hañsī kī
yahī Duube na kashtī zindagī kī

lab pe iz.hār aaj aa hī gayā
maiñ tujhe be-shumār chāhtā huuñ

vo shīrīñ-lab kī kaḌve bol amrit haiñ mire haq meñ
tujhe ma.alūm kyā hai lazzat-e-dushnām ai vaa.iz

mere ham-nafas mere ham-navā mujhe dost ban ke daġhā na de
maiñ huuñ dard-e-ishq se jāñ-ba-lab mujhe zindagī kī duā na de

mohr-ba-lab hai kis liye, kis liye boltā nahīñ
ai dil-e-be-talab! batā kyā koī mudda.ā nahīñ

zindān-e-firāq o lab-e-ḳhāmosh hai aur ham
sair-e-chaman o harf-o-hikāyāt hai aur tū

chhin na jaa.e tirā tabassum-e-lab
mere dard-o-alam kī baat na kar

abr uThā to tamannā jaagī
dil ko shaġhl-e-lab-e-jū yaad aayā

aa sakegā na lab pe rāz-e-ishq
husn kā ehtirām karte haiñ

muddat ke ba.ad 'nūr' hañsī lab pe aa.ī hai
vo apnā ham-ḳhayāl banā le gayā mujhe

tishnagī hī tishnagī hai kis ko kahiye mai-kada
lab hī lab ham ne to dekhe kis ko paimāna kaheñ

mere lab par koī duā hī nahīñ
is karam kī kuchh intihā hī nahīñ

sharm se aab hue nīshkar-o-qand-o-nabāt
dekh kar ai shakarīñ-lab tirī shīrīñ-dahnī

lab-e-rañgīñ haiñ tire rashk-e-aqīq-e-yamanī
zeb detī hai tujhe nām-e-ḳhudā kam-suḳhanī

ik naġhma-e-rañgīñ huuñ lab-e-sāz-e-mizha par
'sādiq' jaras-e-ġhuncha huuñ tasvīr-e-sadā huuñ

jaane kyā gul khilā.e shām-e-bahār
hasrat-e-zulf-o-lab nahīñ dil meñ

kaun sī hai vo aarzū ki 'salām'
aaj bhī tishna-lab nahīñ dil meñ

saañs ukhḌī huī sūkhe hue lab kuchh bhī nahīñ
pyaas kā naam hī raushan hai bas ab kuchh bhī nahīñ

zindagī khiñch ga.ī mujh se tire abrū kī tarah
apne hī ḳhuun kā pyāsā huuñ lab-e-jū kī tarah