Tags-Lab

kaun ye pursish-e-ahvāl ko aayā 'tāriq'
lab haiñ ḳhāmosh magar dīda-e-nam bolte haiñ

kanār-e-lab meñ na rahtī thī mauj-e-goyā.ī
tabī.atoñ meñ suḳhan kā bahāv aisā thā

jigar meñ Tiis lab hañsne pe majbūr
kuchh aisī hī hamārī zindagī hai

mire haath haiñ to lūñgā ḳhud maiñ ab apnā sāqi-e-mai-kada
ḳhum-e-ġhair se to ḳhudā kare lab-e-jām bhī mirā tar na ho

vo baat jis se dhuāñ uTh rahā hai siine se
vo baat lab pe agar aa ga.ī to kyā hogā

lab o dandāñ kā tumhāre jo hai dhyāñ aaTh pahar
nahīñ lagtī mirī taalū se zabāñ aaTh pahar

hañsī un kī gul aur chaman jānte haiñ
ye lab muskurāne kā fan jānte haiñ

aah vo harf-e-tamannā ki na lab tak aa.e
haa.e vo baat ki ik ik kī zabāñ tak pahuñche

harf o lab se hotā hai kab adā har ik mafhūm
be-zabān āñkhoñ kī guftugū bhī samjhā kar

mere chehre se jo paḌh sakte ho paḌh lo yaaro
dil kī har baat mire lab pe kahāñ aa.ī hai

āb-e-paikāñ paas hai lekin nasīb
phir bhī ḳhushkī hai lab-e-sofār meñ

lab-e-ḳhamosh mujhe aah aah karne de
gunāh ishq sahī ye gunāh karne de

mirī mushkil agar āsāñ banā dete to achchhā thā
laboñ se lab dam-e-āḳhir milā dete to achchhā thā

taras ga.e the mire lab hañsī ko jis ke sabab
huā hai aaj vahī ashk-bār mere liye

tujh lab ke tabassum meñ hai ejāz-e-masīhā
ai jān-e-'sirāj' is dil-e-be-jāñ kuuñ jalā dekh

jāñ-ba-lab haiñ tire mushtāq sar-e-rāh-e-hayāt
dam-e-īsā-o-mai-e-lāl-o-gul-e-tar laanā

dil-e-yāqūt hai tujh la.al-e-lab ke rashk se pur-ḳhūñ
tire dandāñ ke aage ghaT gayā hai mol hīroñ kā

ham jām-e-mai ke bhī lab tar chūste nahīñ
chaskā paḌā huā hai tumhārī zabān kā

kahnā to hai mujhe bhī hadīs-e-ġham-e-hayāt
lab kholne kī kaash ijāzat zamāna de