Tags-Lab

ham sabr-o-razā ke bande haiñ jo tum ne kiyā sab jhel liyā
ab dil meñ bhī afsos nahīñ ab lab par bhī haihāt nahīñ

us lab kā liyā bosa na kabhū haihāt na lipTā pāvoñ se
dil tujh se ba-rañg-e-pān-o-hinā ye bhī na huā vo bhī na huā

har ek āñgan ḳhamosh pahre har ek lab par sukūt taarī
hamāre ghar ghar jo TūTte haiñ qayāmatoñ ke azaab paḌhnā

tire dil meñ bhī haiñ kudūrateñ tire lab pe bhī haiñ shikāyateñ
mire dostoñ kī navāzisheñ mire dushmanoñ kī ināyateñ

qurbat-e-husn ġhazab hai ki sar-e-mahfil-e-nāz
us ke lab se nahīñ hotā lab-e-paimāna judā

nahīñ faal lab pe us ke ye hai mehr ḳhāmushī kī
vahī samjhe hai ye nukta ki jo hai baḌā suḳhan-dāñ

vahīñ jhaḌ-guloñ ke tuude bañdheñ gulbanoñ ke nīche
kabhū sub.h-dam chaman meñ jo vo ġhuncha-lab ho ḳhandāñ

yahīñ tak laa.ī hai ye zindagī bhar kī masāfat
lab-e-dariyā huuñ maiñ aur vo pas-e-dariyā khilā hai

zindagī bhar jo lab pe aa na sakī
dard-o-ġham kī vo dāstāñ ham the

itnī sī baat pe bigḌe hī chale jaate ho
le lo tum bosa-e-lab bosa-e-lab ke badle

pista-e-lab se ham ko quvvat do
dil-e-bīmār kī davā ho tum

sehr-e-goyā.ī ke kis dasht kā faizān hai ye
har suḳhan lab se tire sūrat-e-āhū niklā

zabāñ gum thī asar ke zā.iqoñ meñ
tirā mujrim lab-e-goyā nahīñ hai

mere maazī se chalī aatī hai har roz vo raat
paas aa jaate haiñ tere lab o zulf o ruḳhsār

bharī huī hai vo kām-o-dahan meñ talḳhī-e-zīst
ki lab pe jām-e-mohabbat bhī ḳhush-gavār nahīñ

thī hameñ aarzū lab-e-ḳhandāñ
so evaz us ke chashm-e-tar dekho

kyā chiiz hai uzr-e-lab-e-iz.hār kā saaya
iqrār kā saaya kabhī inkār kā saaya

ka.abe meñ jāñ-ba-lab the ham dūrī-e-butāñ se
aa.e haiñ phir ke yaaro ab ke ḳhudā ke haañ se

ye kaḌvāhaT kī bāteñ haiñ miThās in kī na pūchho tum
nam-e-lab ko tarastī haiñ so pyaas in kī na pūchho tum