Tags-Lab

Dhañg aayā na tujhe bhes badalne kā 'sa.īd'
baat jo dil meñ hai tere vahī lab par kyuuñ hai

jumbish-e-lab kī bhī jur.at nahīñ hāsil hai agar
phir mire dil meñ ye jazbāt kā lashkar kyuuñ hai

kisī kā naam pukāreñ kisī ko yaad kareñ
hamāre lab pe tirā naam aa hī jaatā hai

abhī se aañkh meñ aañsū haiñ lab par aah dil meñ dard
ye āġhāz-e-mohabbat hai to phir anjām kyā hogā

ḳhalish dil meñ jigar meñ dard lab par mohr-e-ḳhāmoshī
ye sūrat hai to phir mujh ko bhalā ārām kyā hogā

gardish-e-aflāk ke hāthoñ bahut barbād haiñ
ham lab-e-ayyām par ik dukh bharī fariyād haiñ

ik taaza mohr-e-lab se junūñ māñgtā hai naqsh
jumbish laboñ kī silsila-āmez abhī se hai

kuchh boliye to kaise mazlūm se khaḌe haiñ
āñkheñ haiñ DabDabā.ī lab kapkapā rahe haiñ

chshme-e-be-kaif meñ kārinda-e-manzar na rahā
tishna-lab ḳhvāb rahā surḳh samundar na rahā

tez lahreñ aa hī jaatī haiñ miTāne ke liye
jab lab-e-sāhil gharauñdā ret kā tāmīr ho

ham-nashīñ us ke lab o ruḳhsār hoñ yā sair-e-gul
tazkira koī bhī ho niklegī mai-ḳhānoñ kī baat

rishta-e-yād-e-butāñ TuuTā na tark-e-ishq se
hai haram meñ ab bhī zer-e-lab sanam-ḳhānoñ kī baat

zindagī ḳhuub hai insāf tirī duniyā kā
dard detī hai magar lab pe hañsī laatī hai

vo shakkarīñ-lab ne gosh-e-dil señ tamām sun kar yuuñ reḳhta kuuñ
kahā vo mīThe bachan señ mujh kuuñ 'sirāj' shīrīñ kalām dastā

us lab se mil hī jā.egā bosa kabhī to haañ
shauq-e-fuzūl o jur.at-e-rindāna chāhiye

tishnagī hī tishnagī hai kis ko kahiye mai-kada
lab hī lab ham ne to dekhe kis ko paimāna kaheñ

shauq-e-visāl hai yahāñ lab pe savāl hai yahāñ
kis kī majāl hai yahāñ ham se nazar milā sake

raunaq-e-bazm ban ga.e lab pe hikāyateñ rahīñ
dil meñ shikāyateñ rahīñ lab na magar hilā sake

phir yuuñ huā ki log mashīnoñ meñ Dhal ga.e
vo dost lab pe le ke dilāsa kidhar gayā

haiñ aap to tamām ḳhudā.ī ke nāḳhudā
merā jahāz bhī lab-e-kausar lagā.iye