Tags-Lab

jumbish-e-mauj-e-sabā se bhī agar lab hil ga.e
baat pakḌī jā.egī mahshar uThāyā jā.egā

zer-e-lab hai abhī tabassum-e-dost
muntashir jalva-e-bahār nahīñ

ho ga.ī ḳhair tirā naam na aayā lab par
ek aahaT tirī ḳhushbū meñ mahaktī huī aa.ī

hijr meñ tar ho kyā dimāġh apnā
ḳhushk lab aap hai ayāġh apnā

kaise sahrā meñ bhaTaktā hai mirā tishna-lab
kaisī bastī hai jahāñ miltā nahīñ paanī tak

jo baat kahnī thī us kī himmat juTā na paa.e
jo lab pe aayā vo harf hī ġhair ho gayā hai

hasb-e-farmān-e-amīr-e-qāfila chalte rahe
pā-ba-jaulāñ dīda-o-lab-doḳhta chalte rahe

kis ne ai bahr-e-husn tujh kuuñ kahā
ki kisī tishna-lab kuuñ aab na de

hameñ bhī fursat-e-yak-ḳhvāb us fazā meñ jahāñ
kiran kiran lab-o-ruḳhsār kī phuvār gire

chūḌiyāñ Dhīlī dilā.ī par shikan māthe pe haat
lab pe ḳhushkī ruḳh pe sūñdhā-pan nazar meñ iltifāt

paiġhām dard-e-dil kā mire ġhuncha-lab satī
pahuñchā sakegā kaun magar duuñ sabā ke haath

zer-e-lab vo mauj-e-tabassum
mere liye tūfān to hogī

tishna-lab ko to mayassar nahīñ ik jur.a-e-āb
bul-havas luqma-e-tar se nahīñ jaane vaalā

jo tabassumoñ se ho gul-fishāñ vahī lab hañsī ko taras ga.e
hamīñ shahryār-e-hayāt the hamīñ zindagī ko taras ga.e

talḳh lamhoñ meñ lab se shīrīnī
mere kānoñ meñ gholtā hai kaun

chhīn kar lab se tabassum kī lakīr
jhiil sī āñkhoñ meñ paanī de gayā

lab-e-fariyād agar kholūñ to kyā hañgāma barpā ho
ḳhamoshī ko mirī jab guftugū-e-dil samajhte haiñ

tum samundar kī rifāqat pe bharosa na karo
tishnagī lab pe sajā.e hue mar jāoge

lab-e-'kalīm' pe ab naġhma-e-bahār to hai
ye aur baat ki āñkheñ haiñ shabnamī phir bhī

dariyā ke paas dekho kab se khaḌā huā hai
ye kaun tishna-lab hai paanī se Dar rahā hai