Tags-Lab

miT gayā ġham tire takallum se
lab hue āshnā tabassum se

raat ko baiTh kar lab-e-dariyā
dekhnā āsmāñ ke tāroñ kā

fariyād hī meñ ahd-e-bahārāñ guzar gayā
aise khule ki phir na kabhī lab se lab mile

ham ye samajh rahe the hamīñ bad-nasīb haiñ
dekhā to mai-kade meñ bahut tishna-lab mile

maiñ to is jabr-e-musalsal meñ bhī lab-basta nahīñ
yuuñ samajh le tirā har tiir ḳhatā jā.egā

diyā umiid kā bujhtā hai jaltī āñkhoñ meñ
kisī ke lab pe mire vāste duā koī hai

'vasīm' shahr meñ sachchā.iyoñ ke lab hote
to aaj ḳhabroñ meñ sab ḳhairiyat nahīñ hotī

vo kis hastī ke lab kī jumbihsoñ se
kabhī patthar bhī goyā ho ga.e the

mire harf-e-sad-tamannā se khilā to koī ġhuncha
maiñ nisār-e-yak-tabassum ki huī to lab-kushā.ī

balā-nosh is ḳharābāt-e-jahāñ se kis qadar guzre
lab-e-sāġhar pe zikr-e-rind-e-ḳhush-atvār baaqī hai

vo tire husn kī qīmat se nahīñ haiñ vāqif
pañkhuḌī ko jo tire lab kā badal kahte haiñ

haañ lab pe bhī aa jaao andāz-e-bayāñ ho kar
āñkhoñ meñ bhī aa jaao ab dil kī zabāñ ho kar

zabt ab āḳhirī hadoñ par hai
lab-kushā.ī kā lag gayā dhaḌkā

hāl-e-dil bazm meñ us shoḳh se ham kah na sake
lab-e-ḳhāmosh kī sūrat lab-e-iz.hār rahā

rafta rafta band kaliyoñ ke bhī lab khulne lage
āb-e-sabr o hiddat-e-isbāt mere saath thī

kyā kaheñ zindagī kā kyā kiije
ik lab-e-dam ḳhushī kā kyā kiije

tū sach kah rañg paañ hai ye ki ḳhuun ishq-bāzāñ hai
suḳhan rakhte haiñ kitne shaḳhs tere lab kī laalī meñ

ye ḳhushk-lab ye udaas chehra ye muzmahil muzmahil se aañsū
yahī fasāna yahī haqīqat yahī ḳhamoshī yahī zabāñ hai

bahār-e-zaḳhm-e-lab-e-ātishīñ huī mujh se
kahānī aur asar-āfrīñ huī mujh se

kaasa hai ek fikr se mujh meñ bharā huā
aur ik piyāla dard se lab-rez mujh meñ hai