Tags-Lab

ai zulm ke maato lab kholo chup rahne vaalo chup kab tak
kuchh hashr to un se uTThegā kuchh duur to naale jā.eñge

tirā naqsh utrā sar-e-varaq to tasarruf-e-lab-o-chashm se
bhare rañg maiñ ne kuchh is tarah ise shāhkār banā diyā

māñgtā bhī nahīñ kisī se kuchh
lab pe lekin duā bhī rakhtā hai

zer-e-lab hai abhī tabassum-e-dost
muntashir jalva-e-bahār nahīñ

ḳhud apne jaisā unheñ bhī na saḳht-gīr banā
kabhī kabhī to tire lab mazāq karte haiñ

vasl kī arz kā jab vaqt kabhī paatā huuñ
jā haiñ ḳhāmoshī siiñ tab lab mire aapas meñ mil

palTte bhī nahīñ sarmastiyoñ ke sail aur phir
nishāniyāñ lab-e-dariyā bhī chhoḌ jaate haiñ

āb-e-tāza ḳhanjar-e-ḳhāmosh ko de
hai burīda-lab pe ik fariyād taaza

taḌap talab hai mirī tishna-lab samundar huuñ
habāb kahte haiñ jis ko zabāñ pe chhālā hai

Thes lagtī hai anā ko to baras paḌte haiñ
lab-kushā hote nahīñ ahl-e-suḳhan dānista

har lamha hai aah aah lab par
har saañs vabāl ho gayā hai

shā.irī kī bārishoñ meñ bhīge bhīge tere lab
rab kā hai in.aam 'mīnā' be-zabānī ke liye

talḳhiyoñ se vaqt kī jo ho ga.e nashtar-sifat
lab the vo mash.hūr apnī ḳhush-bayānī ke liye

har ek lab pe hai merī vafā ke afsāne
tire sitam ko abhī lā-zavāl honā hai

koñpal se ek lab se farāmosh ho ke maiñ
kis guftugū meñ tuul banā dekhtā rahā

aaj bhī hai vahī maqām aaj bhī lab pe un kā naam
manzil be-shumār gaam apne safar ko kyā karūñ

na kaho tum bhī kuchh na ham boleñ
aao ḳhāmoshiyoñ ke lab kholeñ

tere sāmne aate hue ghabrātā huuñ
lab pe tirā iqrār hai dil meñ chor bahut

tere ġham kī ḳhushbū se jism o jaañ mahak uTThe
saañs kī havā jab bhī chhū ke mere lab guzrī

ye ashk silsila-e-jāñ ke bolte lab haiñ
chhupā ke daulat-e-nāyāb tum ne rakkhī kyuuñ