Tags-Lab

ye ḳhuuñ kī mahak hai ki lab-e-yār kī ḳhushbū
kis raah kī jānib se sabā aatī hai dekho

jo tamannā kabhī aa.ī na thī lab par 'ḳhālid'
aaj ḳhuuñ ho ke rahī dīda-e-vā se aa.ī

lahū kā lams to ḳhanjar ke lab ne chuus liyā
dikhā.e rañg-e-tabassum ye ashk-bār kise

mahak uḌ jā.egī tafhīm ke lab khulne se
sahar iblāġh kā hai zabt-e-bayāñ tak ai dil

kalī kā lab badan kundan kā qāmat sarv kī lekin
vafā nā-āshnā mere barābar ho nahīñ saktā

shahr-e-be-mehr meñ lab-basta ġhulāmoñ kī qatār
na.e ā.īn-e-asīrī kī binā chāhtī hai

sahrā-e-lā-hudūd meñ tishna-labī kī ḳhair
māhaul-e-ashk-bār meñ lab kī hañsī kī ḳhair

ye dil kī be-qarārī ḳhaak ho kar bhī na jā.egī
sunātī hai lab-e-sāhil se ye reg-e-ravāñ mujh ko

tujh se vahshat meñ bhī ġhāfil kab tirā dīvāna thā
dil meñ terī yaad thī lab par tirā afsāna thā

raat jo zāhid sharīk-e-jalsa-e-rindāna thā
thī surāhī ḳhanda-lab gardish meñ har paimāna thā

muskurānā zer-e-lab har vaqt hī
koī sīkhe aap kī tasvīr se

maiñ charāġh-e-hasrat-e-nīm-shab meñ sharār-e-ātish-e-jāñ-ba-lab
dil-e-pur-umīd kī lau thā maiñ mujhe ḳhud vo aa ke bujhā gayā

chuum kar us but kī peshānī ko pachhtānā paḌā
khiñch gayā mere lab-e-la.al-e-mohabbat se asal

hamīñ the jān-e-bahārāñ hamīñ the rañg-e-tarab
hamīñ haiñ bazm-e-mai-o-gul meñ aaj mohr-ba-lab

kyā qayāmat-ḳhez hai us kā sukūt-e-nāz bhī
ek aalam ko magar vo lab-kushā kartā huā

tapte hue sahrā meñ bhī kuchh phuul khilā.eñ
kab tak lab-o-ruḳhsār kā afsāna kahā jaa.e

dasht-e-ġhurbat meñ un āñkhoñ kī namī yaad aa.e
tishna-lab jaise koī sahrā se paanī māñge

zulm go us ne bahut baar kiye
lab pe mere na shikāyat aa.ī

rū-ba-rū us ke lab-e-arz-e-tamannā na hile
zor-e-afsūn-e-nazar se ga.e bilkul bāñdhe

maslahat kuchh bhī na kahne de to is kā kyā ilaaj
jaane kitnī dāstāneñ haiñ lab-e-ḳhāmosh meñ