Tags-Lab

ḳhudā ko maan ki tujh lab ke chūmne ke sivā
koī ilaaj nahīñ aaj kī udāsī kā

dekhīñ tishna-lab kī āñkheñ
āñkhoñ ke jal-thal ko dekhā

pyaas kyā us kī bujhā.eñge koī āriz-o-lab
lab-e-dariyā na jise pyaas bujhānī aa.ī

koī zulf aḌe to bikhar jaanā koī lab dahkeñ to ThiThur jaanā
kyā tazkiyā karte ho dil kā ye ā.īna saaf nahīñ hotā

yuuñ to be-qufl haiñ lab aur sadā.eñ āzād
phir bhī alfāz ki mahrūm-e-samā.at haiñ abhī

rotī āñkheñ yā hañste lab aap bhī ik saudā.ī haiñ
chup chup rahnā aur tavāf-e-rāhguzar karte jaanā

farāz-e-be-ḳhudī se terā tishna-lab nahīñ utrā
abhī tak us kī āñkhoñ se ḳhumār-e-shab nahīñ utrā

mujh ko hai lab-e-jām-e-shikasta bhī mah-e-īd
saaqī ye hilāl-e-ramazāñ ho nahīñ saktā

sile hoñ lab zabāneñ band to bāteñ nahīñ hotīñ
muḳhālif rāste hoñ to mulāqāteñ nahīñ hotīñ

muddatoñ lab pe rahī nargis-e-bīmār kī baat
kījiye ahl-e-chaman ab ḳhalish-e-ḳhār kī baat

zaḳhmoñ meñ jab dard kī kaskan baḌhtī hai
naalā lab par aa ke duā ho jaatā hai

ye ik ḳhalish ki musalsal satā rahī hai mujhe
ki lab vo kāñpe haiñ kyuuñ koī baat hai shāyad

surḳhī magar us ke lab kī dekhī
rañgat hai safed aarsī kī

lab par haiñ insāf kī bāteñ
dil meñ adāvat kā jazba hai

mire lab pe aa.ī tamannā to bole
haTo chhoḌ jaao ḳhafā ho ga.e ham

hamesha kyā yuuñ hī qismat meñ hai gintī ginā denā
koī naala na lab par lā.iq-e-anjām aa.egā

agar marte hue lab par na terā naam aa.egā
to maiñ marne se dar-guzrā mire kis kaam aa.egā

jis varaq par hai hadīs-e-lab-o-ruḳhsār raqam
us varaq par koī barg-e-gul-e-tar rakh denā

sāya-e-gul meñ lab-e-jū pe gulābī rakho
haath meñ jaam ko lo aap ko badnām karo

nasl-e-ādam se itne uThe kirdgār
apne lab sī ke paiġhambarī rah ga.ī