Tags-Lab

ye fazā-e-dasht shu.ūr-e-bāġh-e-nishāt-o-ḳhuld-e-surūr hai
na suḳhan kī harzah-ḳharoshiyāñ na lab-e-sadā na dam-e-jaras

rāz-e-dil ifshā na ho 'hassān' hai behtar yahī
hāl-e-dil khul kar kabhī lab par na laanā chāhiye

lab-e-ḳhandāñ se na deñ kis liye qātil ko duā
roz zaḳhmoñ pe namak aa ke chhiḌak jaatā hai

ḳhuuñ basta na kyuuñ palkeñ har lahza rahīñ merī
jaate nahīñ āñkhoñ se lab-e-yār ke unnābī

ai falak ham tujhe zālim nahīñ kahte lekin
ġhaur se sun ki sadā-e-lab-e-duniyā kyā hai

akele maiñ tumhārī yaad se bach kar kahāñ jā.ūñ?
lab-e-ḳhāmosh kī fariyād se bach kar kahāñ jā.ūñ?

haañ kuchh to bayān-e-havas-e-dil meñ hai lazzat
jo lab se judā harf-e-tamannā nahīñ hotā

kaise kisī furāt se ho dostī mirī
maiñ tishna-lab husain tire qāfile meñ huuñ

kis kis ko ḳhuub kahiye allāh ne butoñ ko
kyā gosh o chashm kyā lab kyā dast-o-pā diye haiñ

ik savāl-e-vasl par do do sazā.eñ diiñ mujhe
teġh se kaaTā zabāñ ko sī diye lab tiir se

auroñ kā thā bayān to mauj sadā rahe
ḳhud umr bhar asīr-e-lab-e-mudda.ā rahe

rusvā hue zalīl hue dar-ba-dar hue
haq baat lab pe aa.ī to ham be-hunar hue

ye sab karishma-e-arz-e-hunar usī ke haiñ
guloñ meñ naqsh tire hī lab-o-dahan ke haiñ

us bazm meñ nahīñ koī āgāh-e-dard kab
vaañ ḳhanda zer-e-lab idhar ashk-e-nihāñ nahīñ

lab band hoñ to rauzan-e-sīna ko kyā karūñ
thamtā to mujh se nāla-e-ātish-ināñ nahīñ

do din hī meñ ahd-e-tiflī ke ma.asūm zamāne bhuul ga.e
ā.ankhoñ se vo ḳhushiyāñ miT sī ga.iiñ lab ko vo tarāne bhuul ga.e

chāñd ik nazdīk se dekhā thā jab samrān meñ
ham bhī kuchh kahte par apne chashm-o-lab ḳhāmosh the

us kī jānib dekhte the aur sab ḳhāmosh the
us kī āñkheñ boltī thiiñ aur lab ḳhāmosh the

sab ke chehroñ par likhī thiiñ ḳhvāhisheñ 'sultān-rashk'
yuuñ to lab-basta the saare bā-adab ḳhāmosh the

ahbāb kā shikva kyā kījiye ḳhud zāhir o bātin ek nahīñ
lab uupar uupar hañste haiñ dil andar andar rotā hai