Tags-Mahroomi

ik na.e ġham se shanāsā kiyā mahrūmī ne
zindagī jab bhī tirī bazm meñ laa.ī mujh ko

vaa.e mahrūmi-e-taslīm-o-badā hāl-e-vafā
jāntā hai ki hameñ tāqat-e-faryād nahīñ

ḳhuddārī-o-mahrūmī mahrūmī-o-ḳhuddārī
ab dil ko ḳhudā rakkhe ab dil kā zamānā hai

ḳhud tum ne āġhāz kiyā thā jis kā ek tabassum se
mahrūmī ke aañsū ban kar ḳhatm pe vo afsāna hai

mahrūmī kī tasvīreñ bhī kitnī dil-kash hotī haiñ
thak kar sone vaale ko har ḳhvāb sunahrā lagtā hai

dard-e-mahrūmī sahī ehsās-e-nākāmī sahī
us ne samjhā to bahar-sūrat kisī qābil mujhe

maiñ vo bosīda sā pairāhan huuñ jo pahnā gayā thā ek baar
mujh ko mahrūmī kī khūñTī par laTakte dekhtā rahtā hai vo

merī mahrūmī mirā ġhussa na pūchh
barf kī hiddat hai kyā sho.ala hai kyā

ġhulāmī kyā hai zauq-e-husn-o-zebā.ī se mahrūmī
jise zebā kaheñ āzād bande hai vahī zebā

ilm ke dariyā se nikle ġhota-zan gauhar-ba-dast
vaa.e mahrūmī ḳhazaf chain lab sāhil huuñ maiñ

baḌh gayā hai is qadar ehsās-e-mahrūmī 'shakeb'
log apnī zaat se kaT kar guzar karne lage

ābla-pā.ī hai mahrūmī hai rusvā.ī hai
us but-e-nāz kā dil phir bhī tamannā.ī hai

na aarzū koī badlī na merī mahrūmī
badal gayā hai ravayya samāñ nahīñ badlā

ye bhī ik rañg hai shāyad mirī mahrūmī kā
koī hañs de to mohabbat kā gumāñ hotā hai

tamām husn ke jalve tamām mahrūmī
bharam nigāh ne apne gañvā.e haiñ kyā kyā

mere ehsās kī qismat meñ hī mahrūmī thī
kabhī sochā na huā aur kabhī chāhā na huā

ye bazm-e-mai hai yaañ kotāh-dastī meñ hai mahrūmī
jo baḌh kar ḳhud uThā le haath meñ miinā usī kā hai

huā na duur mire dil se zañg-e-mahrūmī
tamām raat ravāñ chashm-e-āb-jū hī rahī

ḳhamoshī ek majbūrī takallum ek mahrūmī
kisī se kah nahīñ sakte magar kahnā hī paḌtā hai

nañg-e-karam hai soz-e-alam se ahl-e-dil kī mahrūmī
dard-e-ishq matā-e-jāñ hai sāhib kuchh to ḳhayāl kareñ