Tags-Mahshar

ai āftāb-e-mahshar kholūñ huuñ daaġh dil kā
chamkā agar ye taarā ma.alūm ho rahegā

yaañ ham ko jis ne maarā ma.alūm ho rahegā
mahshar meñ ḳhuuñ hamārā ma.alūm ho rahegā

maiñ na mānūñgā ye zulmat use kis din ho nasīb
ho ga.e hoñge sharīk shab-e-mahshar gesū

is bharī mahfil meñ ham se dāvar-e-mahshar na pūchh
ham kaheñge tujh se apnī dāstāñ sab se alag

sar-e-mahshar vo yār-e-sho.ala-rū jab be-naqāb aayā
to ahl-e-hashr chīḳh uTThe zamīñ par āftāb aayā

karūñ ik naale se maiñ hashr meñ barpā sau hashr
shor-e-mahshar mujhe sote se jagā.e to sahī

dhuup meñ chhāñv numūdār huī
kaun āḳhir sar-e-mahshar aayā

uThūñgā yūñhī mahshar meñ liye maiñ un ke ḳhanjar ko
gale mere lagāte haiñ ye kyā jallād karte haiñ

jurm kartā hai koī aur sharm aatī hai mujhe
ye sazā kaisī hai maiñ kisī arsa-e-mahshar meñ huuñ

mohabbat zulf kā aaseb jaadū hai nigāhoñ kā
mohabbat fitna-e-mahshar balā-e-nā-gahānī hai

kareñge shikva-e-jaur-o-jafā dil khol kar apnā
ki ye maidān-e-mahshar hai na ghar un kā na ghar apnā

na ḳhauf-e-pursish-e-mahshar na fikr-e-roz-e-hisāb
bashar gunāh par aa.e to be-hisāb kare

tū hai aur terī nazar meñ ik qayāmat kā ġhurūr
maiñ huuñ aur ik mahshar-e-armān-o-hasrat mere saath

āmāl kī pursish na kar ai dāvar-e-mahshar
majbūr to muḳhtār kabhī ho nahīñ saktā

ye tah-e-ḳhāk hai kaisā mahshar
koī mazlūm taḌaptā kyā hai

milegī mahshar meñ daad ab kyā adā-e-matlab meñ huuñ maiñ uljhā
bayān pahle hī kyuuñ kiyā thā tumhāre gesū-e-ambarīñ kā

hazār naale zabāñ pe laatā hazār mahshar abhī dikhātā
shab-e-judā.ī agar na aatā ḳhayāl us chashm-e-surmagīñ kā

kis ke ḳhirām-e-nāz se miltī hai mauj-e-jām
barpā hai ek fitna-e-mahshar sharāb meñ

Duubā huā uThūñ dam-e-mahshar sharāb meñ
de deñ kafan jo yaar Dubo kar sharāb meñ