Tags-Mahshar

kiyā hai dāman-e-mahshar ko afshāñ
uḌe chhīñTe ye kis kis ke lahū se

merī hī rūdād-e-vahshat sun ke fariyādī haiñ sab
chaak mere hī jigar kā dāman-e-mahshar meñ hai

dam-ba-ḳhud fitne haiñ un kī shoḳhi-e-raftār se
ek sannāTe kā aalam arsa-e-mahshar meñ hai

maut kī niiñd ke mātoñ pe na kyuuñ rashk aa.e
jāgnā hai unheñ hañgāma-e-mahshar ban ke

mahshar meñ koī pūchhne vaalā to mil gayā
rahmat baḌhī hai mujh ko gunahgār dekh kar

us galī ke rahne vaale bhī maze ke log haiñ
fitna-e-mahshar se ḳhush hañgāma-e-mahshar se ḳhush

vā nahīñ hotā lab-e-shikva sar-e-mahshar 'ra.īs'
apne sar par ḳhanjar-e-qātil kā ehsāñ dekh kar

rashk-e-mahshar koī qāmat to nigāhoñ meñ jache
dil meñ baaqī hai abhī tāb-o-tavāñ ham-nafaso

ye mere paas jo chup-chāp aa.e baiThe haiñ
hazār fitna-e-mahshar uThā.e baiThe haiñ

sar-e-mahshar baḌhī hai kis qadar zulf
qayāmat kis qadar ochhī paḌī hai

imkān se bāhar kabhī āsār se aage
mahshar hai mire dīda-e-ḳhūñ-bār se aage

mahshar meñ ik savāl kiyā thā karīm ne
mujh se vahāñ bhī aap kī tārīf ho ga.ī

mire jurm mahshar meñ kartī hai ifshā
mire muñh pe merī zabāñ kaise kaise

hujūm-e-isyāñ se kuchh nahīñ Dar samajh chukā huuñ ba-roz-e-mahshar
hai us kī rahmat kā saaya sar par to kyuuñ kahūñ aasrā nahīñ hai

na hilā us ke dar se tā-mahshar
marqad-e-ārzū kī sil huuñ meñ

dekhiye faisla-e-yās-o-tamannā kyā ho
sub.h-e-mahshar kī jhalak tīrgi-e-shām meñ hai

mahshar ke roz bhī na khulegī hamārī aañkh
sadma uThā chuke haiñ shab-e-intizār kā

sukūt kā ye nagar bhī mujhe aziiz rahe
agar maiñ jā ke kisī mahshar-e-navā meñ rahūñ

chaal ne terī fitna-e-mahshar
piis Daalā mujhe hinā kī tarah

dikhā.egā kise mahshar meñ apnā muñh 'anjum'
siyāhkār bhī hai aur rū-siyāh bhī hai