Tags-Mahshar

tū bhī vāqif mirī tāsīr ke mahshar se he
aur minnat-kahs-e-altāf-o-atā huuñ maiñ bhī

kyā ab bhī koī fardā hai baaqī
kis soch meñ ho ai ahl-e-mahshar

mahshar bapā kiyā hai raftār ne tumhārī
is chaal ke tasadduq ye bhī hai koī chalnā

qad se 'nasīr' us ke sadā ik shor-e-mahshar hai bapā
chhūTe azāb-e-qabr se kyā ḳhaak yaañ mar kar bhī ham

haa.el bas ik nafas hai mahshar meñ aur ham meñ
parda habāb kā hai fardā meñ aur dī meñ

mahshar kī āfatoñ kā dhaḌkā nahīñ rahā ab
sau hashr maiñ ne dekhe do din kī zindagī meñ

laa.e haiñ log janāze kī tarah mahshar meñ
kis musībat se tirā kushta-e-bedād aayā

az-roz-e-azal hai ki nahīñ hai kā hai mahshar
aur is kā javāb aaj bhī haañ bhī hai nahīñ bhī

jahāñ 'mīr' zer-o-zabar ho gayā
ḳhirāmāñ huā thā vo mahshar-ḳhirām

butoñ kā zulm kisī ne sunā na mahshar meñ
ḳhudā se bhī mirā jhagḌā na infisāl huā

hashr barpā kar ke leTā huuñ abhī
sone de o fitna-e-mahshar na chheḌ

sunā bhī tū ne ai dil kyā sadā aatī hai mahshar meñ
yahī din imtihāñ kā hai hamāre kaun shāmil hai

milegī shaiḳh ko jannat, hameñ dozaḳh atā hogā
bas itnī baat hai jis baat par mahshar bapā hogā

qayāmat meñ qayāmat kar gayā kaun
ki dil thāme saf-e-mehshar khaḌī hai

liye halqe meñ hoñ sab ahl-e-mahshar
kamar meñ haath ho qātil ho ham huuñ

zabāñ khulegī na mahshar meñ sāmne un ke
kare jo hashr meñ fariyād kis kī jur.at hai

rāh-e-pur-ḳhār pe ye chalte bagūle kī tarah
roz-e-mahshar ke payāmī haiñ musāfir kyā haiñ

saverā hai bahut ai shor-e-mahshar
abhī bekār uThvāyā gayā huuñ

ek zarra nahīñ jo mil jaa.e
aur bapā mahshar-e-tagāpū hai

ai 'alīm' āfatoñ ke ye lashkar haiñ kyā ek mahshar nahīñ laakh mahshar haiñ kyā
us ko fitnoñ kī parvāh bilkul nahīñ tirā ik ek ghuñghrū jise yaad hai