Tags-Mausam

mausam-e-gul tire sadqe tirī aamad ke nisār
dekh mujh se mirā saaya bhī judā hai ab ke

sañg nahīñ huuñ baat na mānūñ mausam kī
huā zarā sī aur lachakne vaalā maiñ

'amabar' laakh savā pañkhī mausam aa.eñ
oloñ kī zad meñ anmol parinde haiñ

aah ye barsāt kā mausam ye zaḳhmoñ kī bahār
ho gayā hai ḳhūn-e-dil āñkhoñ se jaarī in dinoñ

mausam ne āvāz lagā.ī ḳhushbū ko
titlī kā dil phūloñ kī imlāk huā

chale ho jab to hamāre mausam badal chuke haiñ
suno ye mere vabāl le kar kahāñ chale ho

maiñ ek se kisī mausam meñ rah nahīñ saktā
kabhī visāl kabhī hijr se rihā.ī de

tumhāre hijr kā mausam hī raas aayā mujhe
yahī thā ek tabī.at-shanās āñkhoñ kā

mausam-e-gul hai ye ḳhizāñ to nahīñ
kyuuñ hai barham nizām phūloñ kā

girā na aañkh se aañsū fareb-e-qismat par
sukūn jis se ho vo iztirāb paidā kar

mirī shaguft ke mausam abhī nahīñ aa.e
kahīñ kahīñ pe magar phir bhī khil gayā huuñ maiñ

ik umr numū kī ḳhvāhish meñ mausam ke jabr sahe to khulā
har ḳhushbū aam nahīñ hotī har phuul gulāb nahīñ hotā

mausam ne palTā khāyā hai
shahroñ meñ dehātī chiḌiyāñ

sukūn-e-qalb mayassar ho ḳhvāb puure hoñ
kabhī to aa.e dil-e-be-qarār kā mausam

ye ḳhauf dil meñ ubhartā hai dard kī sūrat
badal na jaa.e kahīñ e'tibār kā mausam

yahāñ kabhī bhī ḳhizāñ kā guzar nahīñ hogā
yahāñ hamesha rahegā bahār kā mausam

maiñ us gulāb ko nārāz kar nahīñ saktā
bhale hī ruuTh ke jaa.e bahār kā mausam

baḌe maze se abhī tak guzar rahe haiñ din
isī tarah rahe qaa.em ḳhumār kā mausam

kabhī kabhī to badan ko pata nahīñ chaltā
ki bāġh-e-rūh meñ kab aayā pyaar kā mausam

khile hue haiñ umīdoñ ke phuul dil meñ magar
guzar na jaa.e kahīñ intizār kā mausam