Tags-Mausam

ab ek sā mausam to hamesha nahīñ rahtā
mumkin hai kisī roz achānak koī aa.e

kyā sitam hai ki bahāroñ ke hasīñ mausam meñ
ham parindoñ ne tire shahr se hijrat kī hai

patthar na banā de mujhe mausam kī ye saḳhtī
mar jaa.eñ mire ḳhvāb na ta.abīr ke Dar se

tirī judā.ī ke mausam meñ jān-e-jāñ mujh ko
jo bhuuk pyaas hai kam kam yahī mohabbat hai

kabhī mausam saath nahīñ dete kabhī bel muñDer nahīñ chaḌhtī
lekin yahāñ vaqt badalne meñ aisī koī der nahīñ lagtī

huā rañgīn mausam kā asar āhista āhista
machalte haiñ mire qalb-o-nazar āhista āhista

mausam-e-barf meñ har raat guzartī hai magar
gāhe-gāhe sahī ḳhvābīda lahū boltā hai

har saal bahār se pahle maiñ paanī par phuul banātā huuñ
phir chāroñ mausam likh jaate haiñ naam tumhārā āñkhoñ meñ

bahut hī sard hai ab ke dayār-e-shauq kā mausam
chalo guzre dinoñ kī raakh meñ chiñgāriyāñ DhūñDeñ

zaḳhm-e-dil muskurā rahe haiñ 'shajī.a'
shāyad ab mausam-e-ḳhizāñ guzrā

sabz mausam aa gayā thā room meñ
aa.ine bhī dhānī dhānī ho ga.e

ba-rañg-e-ġhuncha bahār us chaman kī sunte the
pa juuñ hī aañkh khulī mausam-e-ḳhizāñ dekhā

tum bhī julūs-e-mausam-e-gul meñ the pesh pesh
āvāra misl-e-bād-e-sabā ham hue ki tum

is ḳhaak pe mausam to guzarte hī rahe haiñ
mausam hī to ho tum bhī guzar jāoge logo

rafta rafta ho ga.e āḳhir tere naam
merā jīvan mere mausam shahzāde

sard mausam ne ThiThurte hue sūraj se kahā
chādar-e-abr to hai Dhāñp le uryānī ko

kyā kiije tar nivāloñ kā mausam nahīñ rahā
chipke hue haiñ yaar ke ruḳhsār āj-kal

the kabhī ābād jo zaḳhmoñ ke phūloñ se yahāñ
dekhnā vo shahr is mausam meñ sab jañgal hue

sulag uTThe haiñ mausam tishnagī ke
badan chhūne lagīñ giilī havā.eñ

abhī to ḳhushk bahut hai mausam bārish ho to socheñge
ham ne apne armānoñ ko kis miTTī meñ bonā hai